គណៈកម្មការប្រឆាំងអំពើពុករលួយម៉ាឡេស៊ី (MACC)បានបញ្ជាក់ថា ពួកគេបានចាប់ខ្លួនកីឡាករបីនាក់ ពីក្លឹបមួយចំនួននៅលីកកំពូលម៉ាឡេស៊ី ដោយសារប្រព្រឹត្តិការកំណត់លទ្ធផលទុកមុន។
កីឡាករបីនាក់ដែលចាប់បានគឺត្រូវបានគេដឹងថា មានវ័យចន្លោះពី២៦ទៅ២៩ឆ្នាំ ហើយមានម្នាក់ជាកីឡាករសំខាន់ផងដែរ។ (MACC)សម្រេចមិនបញ្ចេញឈ្មោះកីឡាករទាំងអស់នេះទេ។ កីឡាករត្រូវបានចោទប្រកាន់ពីបទទទួលលុយ ពីចន្លោះ១ម៉ឺនរីងហ្គីតម៉ាឡេស៊ី ទៅ៣ម៉ឺនរីងហ្គីតម៉ាឡេស៊ីពីអ្នកភ្នាល់បាល់សម្រាប់ការប្រកួតក្នុងលីកកំពូល។
ប្រភពពី MACC និយាយថា មានកីឡាករជាច្រើននាក់ទៀតដែលជាប់ទាក់ទងការធ្វើខុសក្នុងបាល់ទាត់ ហើយពួកគេគេចមិនផុតពីការស៊ើបអង្កេតរហូតដល់ពិរុទ្ធជនទាំងអស់ត្រូវបានចាប់ខ្លួន។
“ នេះគឺជាការព្រមានដល់អ្នករាល់គ្នា ឲ្យឈប់ធ្វើអំពើលាមកក្នុងបាល់ទាត់តទៅទៀត។ នៅមានមនុស្សជាច្រើនទៀតដែលយើងមិនអាចចាប់ថ្នាក់បាន ប៉ុន្តែពួកយើងដឹងថានឹងត្រូវស៊ើបអង្កេតយ៉ាងណាទៀត ខណៈកីឡាករបីនាក់នេះ ពិន័យមិនឲ្យលេងបាល់អាជីពមួយជីវិត" នេះជាសម្ដីរបស់លោក Datuk Azam Baki ស្នងការរងគណៈកម្មការប្រឆាំងអំពើពុករលួយបាននិយាយក្នុងសេចក្ដីថ្លែងការរបស់ MACC៕
