កំពង់ស្ពឺ ៖ យោងតាមព័ត៌មានច្បាស់ការពីសាច់ញាតិគ្រួសារសពយុវតី លី មុនីរដ្ឋានី បានប្រាប់ Kqube.net នៅមុននេះបន្តិចថា នៅពេលនេះសពយុវតី លី មុនីរដ្ឋានី បានតម្កល់ធ្វើបុណ្យនៅគេហដ្ឋានគ្រួសារសពនៅ ភូមិមុខខេត្ត សង្កាត់រកា ក្រុងច្បារមន ខេត្តកំពង់ស្ពឺ និងត្រូវលើកដាក់លើមេរុនៅវេលាម៉ោង៣ រសៀលនេះ និងត្រូវបូជារំលាយសពនៅវេលាម៉ោង១២រំលងអាទ្រាតយប់នេះផងដែរ។
សូមរំឭកថា កាលពីវេលាម៉ោង១២:២២នាទី យប់ផ្ដាច់ព្រ័ត្រនៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្លងចូលថ្ងៃទី១៧ ខែមេសា ឆ្នាំ២០១៧ យុវតីឈ្មោះ លី មុនីរដ្ឋានី អាយុ១៨ឆ្នាំ ដែលជាប្អូនស្រីពៅតារាម៉ូដែល និងសម្ដែង លី មុន្នីនាថ បានស្លាប់ដោយសារឆក់ខ្សែភ្លើង ក្នុងកំឡុងពេលដែលនាង និងមិត្តភ័ក្ដិកំពុងរាំលេងយ៉ាងសប្បាយ លាយឡំជាមួយការបាញ់ទឹកដាក់គ្នា និងរត់គេចពីក្រុមក្មេងស្ទាវប៉ាតម្សៅទៅវិញទៅមកក្នុងតំបន់កម្សាន្តដ៏ពេញនិយម ផាប់ ស្ទ្រីត ក្នុងក្រុងសៀមរាប៕
