តាមរយៈការសិក្សាពី CIES បានរកឃើញសមត្ថភាព និងការប្រកួតប្រជែងក្នុងការប្រកួតបាល់ទាត់គ្រប់លីកក្នុងប្រទេសនៅពិភពលោក ពានរង្វាន់ធំប្រចាំតំបន់ទ្វីបជាច្រើនទៀតមានភាពខុសគ្នាខ្លះនិងដូចគ្នាខ្លះ។
ខណៈនៅតំបន់អាស៊ីអាគ្នេយ៍ កម្ពុជា មានលីកកំពូលមួយដែលក្លឹបអាចរកគ្រាប់បាល់បានច្រើនបំផុតក្នុងមួយប្រកួត តែជាលីកដែលមានការប្រកួតប្រជែងទាបបំផុតក្នុងតំបន់ផងដែរ។ CIES បានសិក្សាពីភាពខុសគ្នា ដោយផ្អែកតាមការវិភាគជាភាគរយនៃការប្រកួតដែលបញ្ចប់ទៅដោយការរកគ្រាប់បាល់បាន៣គ្រាប់ឡើងទៅ។សូមមិននិយាយពីការវិភាគសមត្ថភាពបាល់ទាត់ក្នុងតំបន់អឺរ៉ុប យើងសុំនិយាយក្នុងតំបន់អាស៊ីដែលមាន ការប្រកួតក្នុង Asian Champions League, ពាន AFC Cup និងលីកកំពូលក្នុងប្រទេស សិង្ហបុរី ថៃ អូស្ត្រាលី កម្ពុជា និងវៀតណាមដែលត្រូវបានគេដឹងថាមានគម្លាតខ្លាំងទាំងសមត្ថភាព និងការរកគ្រាប់បាល់ក្នុងតំបន់។
ដូចនៅតំបន់អឺរ៉ុបដែរ ការប្រកួតប្រជែងភាគច្រើនមានភាពមិនស្មើគ្នា។ ពានធំលំដាប់ទី២ប្រចាំទ្វីបអាស៊ី AFC Cup មានកម្រិត២២ភាគរយ នៃការប្រកួតដែលបញ្ចប់ទៅជាមួយនឹងការរកគ្រាប់បាល់យ៉ាងហោចណាស់៣គ្រាប់សម្រាប់អ្នកឈ្នះ ដែលនេះត្រូវបានគេសន្និដ្ឋានថា ចន្លោះនៃការប្រកួតរបស់ក្រុមខ្លាំង និងក្រុមខ្សោយមានគម្លាតគ្នាខ្លាំងរវាងសមត្ថភាពរបស់ក្លឹប ដែលនេះត្រូវបានគេដឹងថានឹងកាន់រីកដាលពេញទ្វីបអាស៊ី។
តាមមាត្រដ្ឋានជារួម ក្រុមដែលឈ្នះក្នុងលីករបស់កម្ពុជា ត្រូវបានគេដឹងថាមានដល់ទៅ ២៨.៥ភាគរយ នៃការប្រកួតទាំងអស់ដែលការប្រកួតនីមួយៗបញ្ចប់ទៅមានការទាត់បញ្ចូលទីគ្នាលើសពី៣គ្រាប់គិតជាអប្បបរមាដែលនេះត្រូវបានគេចោទជាសំណួរថា ហេតុអ្វីក៏មានគ្រាប់បាល់ច្រើនម្ល៉េះក្នុងមួយប្រកួត។
A-League របស់អូស្ត្រាលីគឺជាលីកដែលចំណាយលុយច្រើនជាងគេ សម្រាប់កីឡាករហើយក៏ជាលីកដែលមានការប្រកួតប្រជែងខ្ពស់ជាងគេទី២របស់ CIES ដែលបានសិក្សា។ ចំណែកលីកម៉ាឡេស៊ី និងសិង្ហបុរីជាលីកមានការប្រកួតប្រជែងខ្ពស់បំផុតក្នុងតំបន់អស់ពីររដូវកាលចុងក្រោយនេះ។
ខាងក្រោមជាបញ្ជីឈ្មោះលីគក្នុងប្រទេសដែលមានគម្លាតគ្នារវាងក្លឹបនឹងក្លឹបពេលប្រកួតចប់៖
CAMBODIA: 28.5%
AFC CUP: 22%
AUSTRALIA: 17.5%
MYANMAR: 17.1%
VIETNAM: 15.6%
ASIAN CHAMPIONS LEAGUE: 14.7%
THAILAND: 14.4%
SINGAPORE: 13.6%
MALAYSIA: 13.2%
កម្ពុជា 28.5%
ជាលីកមួយដែលមានក្លឹបពីរខ្លាំង ហើយមានការប្រកួតប្រជែងខ្លាំងជាងគេ(សម្រាប់តែក្នុងស្រុក) ខណៈក្លឹបដទៃទៀតមិនមានការប្រកួតប្រជែងខ្លាំង ដែលនេះធ្វើឲ្យគេចោទជាសំណួរ។ គ្មានអ្វីភ្ញាក់ផ្អើលទេ ដែលលីកកំពូលកម្ពុជាស្ថិតក្នុងលើកំពូលតារាងការប្រកួតដែលមានភាពមិនស្មើគ្នាច្រើនជាងគេ។ តាមរយៈការសិក្សា គឺមាន៣៨ប្រកួតក្នុងចំណោម១៣២ប្រកួត នៅរដូវកាល២០១៧ និង២៥ប្រកួតក្នុងចំណោម៨៩ប្រកួតកាលពីរដូវកាលមុនគឺ ក្រុមដែលឈ្នះមានស្ថិតិរកគ្រាប់បាល់យ៉ាងហោចណាស់៣គ្រាប់ឡើងទៅ ដែលធ្វើឲ្យគេវិភាគឃើញថា ជាលីកដែលមានការប្រកួតប្រជែងទាបជាងគេបំផុតក្នុងតំបន់ តែជាលីកដែលក្រុមឈ្នះរកគ្រាប់បាល់ចាប់ពីបីគ្រាប់ឡើងទៅច្រើនបំផុត៕
