ក្រសួងការពារជាតិរុស្ស៊ី បានឲ្យដឹងថា ខ្លួនបានដឹកជញ្ជូនជំនួយមនុស្សធម៌របស់អង្គការសហប្រជាជាតិ (UN) ជាង ២០តោន ទៅជួយដល់ជនស៊ីវិលរាប់ពាន់នាក់ ក្នុងទីក្រុង Deir ez-Zor ប្រទេសស៊ីរី។ នេះបើយោងតាមការរបស់គេហទំព័រ Sputnik។
ក្រុមការងារដឹកជញ្ជូនស្បៀងអាហាររបស់រុស្ស៊ី បានបញ្ជាក់ថា ក្នុងរយៈពេល ២៤ម៉ោងចុងក្រោយនេះ កម្លាំងអាកាសរុស្ស៊ីបានដឹកជញ្ជូនស្បៀងអាហារចំនួន ៤.៦តោន យកទៅកាន់ខេត្ត Aleppo និង Damascus ដើម្បីជួយដល់ប្រជាជនប្រមាណជា ១.៤២០នាក់ ដែលកំពុងតែខ្វះខាត។
ទន្ទឹមគ្នានេះ រដ្ឋាភិបាលទីក្រុងមូស្គូ បានជួយសម្រួលដល់ការចែកចាយជំនួយមនុស្សធម៌របស់អង្គការសហប្រជាជាតិ គ្រប់ទីកន្លែង ក្នុងប្រទេសស៊ីរី ដែលកំពុងស្ថិតក្នុងសង្គ្រាមស៊ីវិល ចាប់តាំងពីឆ្នាំ២០១១ មកម្ល៉េះ ៕
