រាជធានីភ្នំពេញ៖ សូមអបអរដល់លោក រិន សាវ៉េត ដែលទទួលបានផ្ទះមួយល្វែងពីសម្ដេចកិត្តិបណ្ឌិត ប៊ុន រ៉ានី ហ៊ុន សែន បន្ទាប់ពីអភិបាលខណ្ឌជ្រោយចង្វារ លោក ឃ្លាំង ហួត បានធ្វើការផ្សាយផ្ទាល់កាលពីព្រឹកមិញ ថ្ងៃទី២៧ ខែមេសា ឆ្នាំ២០១៧នេះ អំពីសកម្មភាពផ្ដល់ថវិកាសប្បុរសជនជូនដល់តារាចម្រៀងរូបនេះ រួមនឹងបានខ្ចីផ្ទះមួយល្វែងពីឧកញ៉ា ពង់ ឃាវសែ សម្រាប់ស្នាក់នៅរយៈពេល២ឆ្នាំដោយឥតគិតថ្លៃថែមទៀត។
រហូតមកដល់រសៀលថ្ងៃនេះដដែលលោក ឃ្លាំង ហួត បានបង្ហោះនៅលើទំព័រហ្វេសប៊ុករបស់លោកថា «ដំណឹងទាន់ហេតុការណ៍! សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានទិញផ្ទះដែលខ្ញុំបានខ្ចីឱ្យ រិន សាវេត រស់នៅជូនជាកម្មសិទ្ធផ្ទាល់ខ្លួនរបស់រិនសាវេតតែម្ដង។ ខ្ញុំបាទសូមគោរពថ្លែងអំណរគុណចំពោះចិត្តមេត្តាធម៌របស់សម្ដេចទាំងទ្វេ សូមវត្ថុស័ក្កសិទ្ធក្នុងលោក ទេវតាឆ្នាំថ្មីតាមជួយបីបាច់ថែរក្សាសម្ដេចទាំងទ្វេ ព្រមទាំងក្រុមគ្រួសារជួបតែពុទ្ធពរ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»។
ដូច្នេះបានសេចក្ដីថា ផ្ទះដែលលោកអភិបាលខណ្ឌជ្រោយចង្វារឲ្យខ្ចីរស់នៅចំនួនពីរឆ្នាំនោះ ឥឡូវនេះលោក រិន សាវេត ទទួលបានសិទ្ធិកាន់កាប់ទាំងស្រុងតែម្ដង ក្រោមការឧបត្ថម្ភពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ទាល់តែម្ដង៕