កូរ៉េខាងជើង បានបង្ហាញអនុភាពទាហានពិសេសរបស់ខ្លួន ក្នុងក្បួនព្យុហយាត្រា ដែលជាការសម្ដែងកម្លាំងទាហានពិសេសលើកដំបូង ក្នុងពេលដែលឧបទ្វីបកូរ៉េស្ថិតក្នុងសភាពតានតឹងក្រោមការគំរាមវាយប្រហារពី សហរដ្ឋអាមេរិក ។
កងទ័ពដែលហ្វឹកហ្វឺនដល់កម្រិត បំពាក់ដោយកាំភ្លើងវែង កាំភ្លើងខ្លី គ្រាប់បែកនិងសម្ភារយោធា តុបតែងមុខមាត់ដូចៗគ្នា ព្រមទាំងមានវ៉ែនតាអាចមើលនៅពេលយប់ ដើរក្បួនព្យុហយាត្រាក្នុងទីក្រុងព្យុងយ៉ាង ទស្សនាដោយមេដឹកនាំ គីម ជុងអ៊ុន និងមន្ត្រីជាន់ខ្ពស់ ។
សារព័ត៌មានរដ្ឋ កូរ៉េខាងជើង ផ្សាយថានៅពេលដែលមេបញ្ជាការកំពូល គីម ជុងអ៊ុន ចេញបញ្ជា ទាហានពិសេសទាំងនោះ អង់អាច អស្ចារ្យ វាយប្រហាររហ័សដូចជាផ្លេកបន្ទោរ សំដៅទៅរកសត្រូវ ដោយគ្មានញញើតអ្វីឡើយ ។ ការបង្ហាញកម្លាំងទ័ពរបស់ទាហានពិសេស កូរ៉េខាងជើង គឺជាសកម្មភាពកម្របំផុត ដោយក្បួនព្យុហយាត្រាមុនៗ មិនធ្លាប់មានការសម្ដែងទាហានពិសេសដូចខួប ១០៥ ឆ្នាំ ថ្ងៃកំណើតស្ថាបនិក គីម អ៊ីលស៊ុង ក្នុងឆ្នាំ ២០១៧ នេះឡើយ ។
អតីតទាហាន កូរ៉េខាងជើង អ៊ុង ជីលលី ដែលរត់ភៀសខ្លួនទៅ កូរ៉េខាងត្បូង ក្នុងឆ្នាំ ២០០៤ និយាយថា របប កូរ៉េខាងជើង សម្ដែងអនុភាពទាហានពិសេសតែក្នុងពេលមានសង្គ្រាមប៉ុណ្ណោះ ហើយព្រឹត្តិការណ៍នេះ ត្រូវបានរៀបចំឡើងសម្រាប់ការត្រៀមក្នុងពេលមានសង្គ្រាម ។ លោក អ៊ុង ជីលលី បញ្ជាក់ថា ពួកគេអាចបន្លំខ្លួនចូលប្រទេស កូរ៉េខាងត្បូង ដោយប្ដូរសម្លៀកបំពាន់ ហើយចូលទៅក្នុងតំបន់ផ្សេងៗ ។
ប្រភពៈ thesun
