ប៉ូលិសបានប្រគល់ប្រាក់ ៥ ម៉ឺនដុល្លារដល់បុគ្គលិកហាងលក់មាន់បំពងមួយកន្លែងក្នុងរដ្ឋ Pennsylvania ដែលបានទូរស័ទ្ទហៅប៉ូលិស នៅពេលឃើញឃាតកដែលសម្លាប់បុរសចំណាស់ម្នាក់កាលពីថ្ងៃច័ន្ទ ចូលទិញមាន់បំពង។
ឈ្មោះ ស្ទីវ ស្ទេវឹន (Steve Stephens) ដែលបានធ្វើអំពើឃាតកម្ម អះអាងក្នុងវីដេអូនោះថា ខ្លួនបានសម្លាប់មនុស្សជាង ១០ នាក់ផ្សេងទៀត ។ ស្ទីវ ស្ទេវឹន បានបាញ់សម្លាប់បុរសអាយុ ៧៤ ឆ្នាំ ឈ្មោះ រ៉ូប៊ឺត ហ្គតវីន (Robert Godwin) ក្នុងរដ្ឋ អូហាយ៉ូ ពេលដែលជនរងគ្រោះកំពុងដើរទៅផ្ទះចេញពីកន្លែងបរិភោគអាហារថ្ងៃត្រង់កាលពីល្ងាចថ្ងៃអាទិត្យហើយបង្ហោះវីដេអូនៃការធ្វើឃាតនោះតាមបណ្ដាញ Facebook ។
នៅថ្ងៃពុធនេះ ស្ទីវ ស្ទេវឹន បានរត់ទៅដល់រដ្ឋ Pennsylvania ហើយចូលទិញមាន់បំពង ប៉ុន្តែបុគ្គលិកក្នុងហាងស្គាល់មុខ លួចទូរស័ព្ទទៅប៉ូលិស និងប្រាប់ឲ្យ ស្ទេវឹន រង់ចាំបន្តិច ប៉ុន្តែ ស្ទេវឹន មិនចង់រង់ចាំឡើយ ក៏បើករថយន្តចេញ ។
ទោះយ៉ាងណា ប៉ូលិសបានទៅដល់ភ្លាមៗ និងដេញតាមរថយន្តឃាតក ។ ទីបំផុតឃាតកបានចុះពីរថយន្តនៅពេលប៉ូលិសឡោមព័ទ្ធជាប់ និងបាញ់សម្លាប់ខ្លួនឯង ដោយមិនព្រមឲ្យប៉ូលិសចាប់ខ្លួនឡើយ ។
ប្រភពៈ telegraph
