១ថ្ងៃក្រោយប្រធានាធិបតីអាមេរិក រិះគន់រដ្ឋាភិបាល អ៊ីរ៉ង់ នៅក្នុងដំណើរទស្សនកិច្ចមជ្ឈិមបូព៌ា ជាមួយស្ដេច អារ៉ាប៊ីសាអ៊ូឌីត រដ្ឋមន្ត្រីការបរទេសអ៊ីរ៉ង់ លោក Mohammad Javad Zarif បានថ្កោលទោសយ៉ាងខ្លាំងទៅលើលោក ដូណាល់ ត្រាំ ចំពោះការចោទប្រកាន់ថា ទីក្រុងតេហេរ៉ង់ កំពុងធ្វើសកម្មភាពភេរវកម្ម និងបានអំពាវនាវឱ្យអ៊ីរ៉ង់បញ្ឈប់ការបាញ់សាកល្បងមីស៊ីលផ្លោងទៀតផង។
បើយោងតាមការចុះផ្សាយរបស់សារព័ត៌មាន Sputnik រដ្ឋមន្ត្រីការបរទេស លោក Javad Zarif បានឆ្លើយតបវិញថា សហរដ្ឋអាមេរិកកំពុងប្រើល្បិចយកលុយពីស្ដេច អារ៉ាប៊ីសាអ៊ូឌីត តាមរយៈកិច្ចព្រមព្រៀងលក់អាវុធ តម្លៃជាង ១១០ពាន់លានដុល្លារជាមួយទីក្រុងរីយ៉ាត។ លោកនិយាយថា រដ្ឋមន្ត្រីការបរទេសអាមេរិក បានធ្វើកិច្ចព្រមព្រៀងលក់អាវុធទៅឲ្យ អារ៉ាប៊ី សាអូឌីត ដោយប្រើនយោបាយថា ប្រទេសមួយនេះ អាចនឹងប្រឈមមុខនឹងការគំរាមកំហែងពីសំណាក់ អ៊ីរ៉ង់។
គួររម្លឹកផងដែរថា កាលពីថ្ងៃអាទិត្យ ទី២១ ម្សិលមិញ លោក ដូណាល់ ត្រាំ បានថ្លែងក្នុងកិច្ចប្រជុំកំពូលអ៊ីស្លាម-សហរដ្ឋអាមេរិក ក្នុងទីក្រុងរីយ៉ាតថា អ៊ីរ៉ង់កំពុងដឹកនាំសកម្មភាពភេរវកម្ម បង្កជម្លោះនៅក្នុងតំបន់មជ្ឈិមបូព៌ា និងបានជំរុញឲ្យស្ដេចអារ៉ាប៊ីសាអ៊ូឌីត ទិញអាវុធរបស់ខ្លួន ដើម្បីការពារការគំរាមកំហែងពីសំណាក់ទីក្រុងតេហេរ៉ង់៕
