សិល្បៈ ៖ ចំណងដៃក្រោយពិធីបុណ្យចូលឆ្នាំខ្មែរ តារាចម្រៀង ខេម និងអ្នកនិពន្ធលោក ងួន សុបិន ពិតជាធ្វើឲ្យអ្នកគាំទ្រមិនសរសើរមិនបានឡើយ ខណៈដែលពួកគេបានរួមដៃគ្នានិពន្ធ និងច្រៀងបទចម្រៀងមួយបទ "ឈាមលោកឪពុក" ដែលជាបទចម្រៀងមួយរៀបរាប់ពីក្ដីស្រឡាញ់របស់ពុកម្នាក់មានកូនស្រីកើតជំងឺឈាមសស៊ីឈាមក្រហម ដោយលោកបានបរិច្ចាគឈាមមកកូនស្រីរហូតអស់លទ្ធភាពតែនៅមិនគ្រប់គ្រាន់ ដែលតម្រូវឲ្យបងប្អូនជួយពួកគាត់បន្ត។
លោក ខេម បានប្រាប់លោក តាន់ ចន្ថា អ្នកផលិតព័ត៌មានវេបសាយ Kqube.net នៅមុននេះបន្តិចថា បទចម្រៀងថ្មីមួយនេះនិពន្ធដោយលោក ងួន សុបិន ច្រៀងដោយរូបលោក និងធ្វើបទភ្លេងដោយលោក ដាភ្លេង។ បទចម្រៀង Original មួយបទនេះមិនទាន់បានចេញជា Audio នៅ ថោន នៅឡើយ គឺគ្រោងចេញនៅក្នុងសប្ដាហ៍នេះ តែលោកមិនទាន់បានដឹងថ្ងៃច្បាស់ទេ។
ខេម បន្តថា បទចម្រៀងថ្មីមួយបទនេះការដែលលោករួមគំនិតគ្នាជាមួយអ្នកនិពន្ធធ្វើឡើង គឺមានគោលបំណងចង់ឲ្យបងប្អូនខ្មែរយើងចូលរួមបរិច្ចាគឈាមឲ្យបានកាន់តែច្រើន ព្រោះនៅតាមមន្ទីរពេទ្យកំពុងខ្វះឈាមសម្រាប់ជួយសង្គ្រោះជីវិតបងប្អូនរួមជាតិយើងជារៀងរាល់ថ្ងៃ ដូច្នេះហើយតាមរយៈបទចម្រៀងមួយបទនេះសង្ឃឹមថាទស្សនិកជនសម្រេចចិត្តជាថ្មីចូលរួមផ្ដល់ឈាម ព្រោះការផ្ដល់ឈាមមិនមានគ្រោះថ្នាក់ ឬឈឺខ្លាំងពេលចាក់ម្ជុលទេ ព្រោះតាមការពន្យល់ពីគ្រូពេទ្យបើយើងផ្ដល់ឈាមហើយ គឺឈាមថ្មីនឹងកកើតឡើងវិញ តែចំណុចសំខាន់គឺយើងបានជួយសង្គ្រោះជីវិតមនុស្សម្នាក់ ដែលជាមហាកុសលផលបុណ្យ។
លោក ងួន សុបិន បានប្រាប់ថា ការដែលលោកនិពន្ធបទចម្រៀងមួយបទនេះឡើង គឺដោយសារលោកមើលឃើញរឿងពិតរបស់ពូម្នាក់ គាត់មានកូនស្រីកើតជំងឺឈាមសស៊ីឈាមក្រហម ដែលត្រូវការប្ដូរឈាមញឹកញាប់ ដូច្នេះហើយខ្លួនគាត់ម្នាក់ឯងបានបូមឈាមជួយកូនស្រីរហូតអស់លទ្ធភាព ដែលគ្រូពេទ្យមិនអាចបូមបន្តទៀតបាន តែកូនស្រីគាត់នៅតែត្រូវការឈាម ។
លោកបន្តថា ភាពជាក់ស្ដែងនេះហើយ ទើបលោកមានគំនិតនិពន្ធបទចម្រៀងមួយបទនេះទម្លាក់ឲ្យលោក ខេម ច្រៀង ព្រោះលោកគិតថា ពេលបទចម្រៀងនេះបានផ្សព្វផ្សាយដល់ជនរួមជាតិ នឹងមានការចូលរួមផ្ដល់ឈាមកាន់តែច្រើន យើងរួមគ្នាជួយខ្មែរ ដើម្បីជាតិខ្មែរ ៕
