នាវាមុជទឹក HMS Audacious ជំនាន់ថ្មីរបស់ ដើរដោយថាមពលនុយក្លេអ៊ែរ គឺជានាវាមុជទឹកមួយគ្រឿង ក្នុងចំណោមនាវាមុជទឹកទាំង ៧ គ្រឿងរបស់កងទ័ពជើងទឹក ចក្រភពអង់គ្លេស ទើបតែដាក់ចុះកំពង់ផែប៉ុន្មានថ្មីកន្លងទៅនេះ ដើម្បីបន្ថែមដល់អំណាចកងទ័ពជើងទឹក ។
HMS Audacious ផលិតឡើងដោយមានសំឡេងស្ងាត់បំផុតក្នុងពេលបំពេញប្រតិបត្តិការ អាចលាក់បាំងពីការតាមដានរបស់សត្រូវ ព្រមទាំងអាចស្ថិតនៅក្រោមទឹករហូតដល់ ២៥ ឆ្នាំ ដោយមិនចាំបាច់ងើបមកខាងលើផ្ទៃទឹកឡើយ ។ ទោះយ៉ាងណា HMS Audacious នឹងដាក់ឲ្យប្រើប្រាស់សម្រាប់កងទ័ពជើងទឹក ចក្រភពអង់គ្លេស នៅឆ្នាំ ២០១៨ ។
ម៉ាស៊ីនរបស់នាវា អាចធ្វើប្រតិកម្មចម្រោះយកទឹកសាប និងចម្រោះអុកស៊ីហ្សែនទឹកសមុទ្រ សម្រាប់ការប្រើប្រាស់របស់នាវិក និងសម្រាប់ផ្គត់ផ្គង់ដល់ម៉ាស៊ីន ។ នាវាអាចលាក់ខ្លួនគ្រប់ទីកន្លែងនៃមហាសមុទ្រ ដោយសម្ងំរយៈពេលច្រើនខែ ឬអាចរហូតដល់ច្រើនឆ្នាំ ។
HMS Audacious មិនត្រូវបានផលិតឡើងដើម្បីប្រើប្រាស់សម្រាប់បាញ់មីស៊ីលបំពាក់ក្បាលគ្រាប់នុយក្លេអ៊ែរឡើយ គឺប្រើប្រាស់តែមីស៊ីល Tomahawk និង គ្រាប់បាញ់ក្រោមទឹក Spearfish torpedoes តែប៉ុណ្ណោះ ។ ចក្រភពអង់គ្លេស មាននាវាមុជទឹក ៤ គ្រឿងដែលមានសមត្ថភាពបាញ់មីស៊ីលបំពាក់ក្បាលគ្រាប់នុយក្លេអ៊ែរ ។
ប្រវែង ៩៧ ម៉ែត្រ
ចាប់ផ្ដើមសាងសង់ ថ្ងៃទី ២៤ មិនា ២០០៩
ទម្លាក់ទឹក ថ្ងៃទី ២៨ មេសា ២០១៧
សាងសង់ដោយ BAE Systems Maritime – Submarines
ដំណើរការ ២០១៨
ប្រភពៈ sputniknews
