ក្នុងរយៈពេល ៣សប្ដាហ៍ កូរ៉េខាងជើងបានបាញ់សាកល្បងមីស៊ីលផ្លោងរបស់ខ្លួនចំនួន ៣ មានន័យថា ១អាទិត្យបាញ់មួយគ្រាប់ ជាក់ស្ដែងដូចកាលពីថ្ងៃអាទិត្យ ទី២៨ ម្សិលមិញ ទីក្រុងព្យុងយ៉ាង បានធ្វើតេស្តមីស៊ីលទីបី ម៉ាក Scud ដែលមានរយៈចម្ងាយខ្លី ប្រមាណជា ៤៥០គីឡូម៉ែត្រតែប៉ុណ្ណោះ។
បើតាមការអះអាងពីយោធាកូរ៉េខាងត្បូង ក្នុងរយៈពេលបីសប្ដាហ៍នេះ កូរ៉េខាងជើងបានបាញ់សាកល្បងមីស៊ីលប្រកបដោយជោគជ័យមានរហូតដល់៣គ្រាប់ទៅហើយ ដោយមីស៊ីលចុងក្រោយគឺជាប្រភេទរយៈចម្ងាយខ្លីមួយ ដែលបានបាញ់ចេញពីតំបន់ឆ្នេររបស់ខ្លួន ឆ្ពោះទៅកាន់សមុទ្រជប៉ុន កៀកនឹងតំបន់សេដ្ឋកិច្ចពិសេស EEZ។
គួរបញ្ជាក់ផងដែរថា កូរ៉េខាងជើង កំពុងប្រឈមមុខយ៉ាងខ្លាំងទៅនឹងការថ្កោលទោស និងដាក់ទណ្ឌកម្មពីសំណាក់ក្រុមប្រឹក្សាសន្តិសុខ អង្គការសហប្រជាជាតិ (UN)។ មួយវិញទៀតមីស៊ីលសប្ដាហ៍ចុងក្រោយរបស់ទីក្រុងព្យុងយ៉ាងនេះ បានធ្វើឲ្យរដ្ឋាភិបាលជប៉ុនខឹងសម្បាយ៉ាងខ្លាំង និងថែមទាំងប្ដេជ្ញា ចាត់វិធានការក្ដៅឆ្លើយតបវិញទៀតផង៕
ប្រភព៖ BBC
