រាជធានីភ្នំពេញ៖ នាយឧត្ដមសេនីយ៍ផ្កាយ មាស៥ ផុតលេខ បានអញ្ជើញទៅទទួលសព និងគោរពវិញ្ញាណក្ខន្ធទាហានមួកខៀវកម្ពុជាទាំង៤រូបដែលត្រូវបានធ្វើមាតុភូមិនិវត្តន៍ពីប្រទេសអាហ្វ្រិកកណ្ដាលមកដល់ នៅអាកាសយានដ្ឋានអន្តរជាតិភ្នំពេញនៅយប់ថ្ងៃទី២១ ខែឧសភា ឆ្នាំ២០១៧ ម្សិលមិញនេះ។
ក្រោយពីពិធីសាសនា និងពិធីទទួលសពជាផ្លូវការ ដោយ នាយឧត្ដមសេនីយ៍ផ្កាយ មាស៥ ដែលជាប្រមុខរាជរដ្ឋាភិបាលកម្ពុជាហើយ សពវីរទាហានមួកខៀវកម្ពុជាទាំង៤រូប ត្រូវបានរៀបចំដឹកទៅកាន់លំនៅឋានរបស់សពរៀងៗខ្លួន ដែលស្ថិតនៅរាជធានីភ្នំពេញ (១) ខេត្តពោធិ៍សាត់ (១) ខេត្តសៀមរាប (១) និងខេត្តស្វាយរៀង (១)។ ពិធីដង្ហែសព នេះគឺអមដោយកម្លាំងអាវុធហត្ថជាច្រើននាក់ និងកម្លាំងនគរបាលឈរយាម តាមផ្លូវបណ្ដាក់គ្នាផងដែរ។
នៅក្នុងពិធីទទួលសពទាំងយប់នេះ គឺមានការរៀបចំជាក្បូនត្រែទ័ព ដោយក្រសួងការពារជាតិ ដើម្បីផ្តល់ កិត្តិយសទទួលឲ្យសក្តិសមទៅនឹងការលះបង់ដ៏អង់អាចក្លាហានរបស់កងទ័ពយើងក្នុងបុព្វហេតុជាតិមាតុភូមិ និងបុព្វហេតុថែរក្សាសន្តិភាពជាមួយអង្គការសហប្រជាជាតិនៅក្នុងប្រទេសដែលកំពុងមាន សង្រ្គាម។
មុននឹងអញ្ជើញទទួល និងគោរពវិញ្ញាណក្ខន្ធដល់សពវីរទាហានទាំង៤រូប នាយឧត្ដមសេនីយ៍ផ្កាយមាស សម្តេតេជោ ហ៊ុន សែន បានជួបសំណេះសំណាលជាមួយគ្រួសារសព និងបានសំដែងនូវក្តីសោកស្ដាយយ៉ាងខ្លាំងចំពោះការ បាត់បង់វីរទាហានដ៏ឆ្នើមរបស់កម្ពុជា។
សូមរម្លឹកផងដែរថា ទាហានមួកខៀវកម្ពុជា៤រូបគឺបានពលីជីវិតនៅប្រទេសអាហ្រិ្វកកណ្តាល ក្នុងពេល បំពេញបេសកកម្មជាមួយអង្គការសហប្រជាជាតិ (UN) កាលពីយប់ថ្ងៃទី០៨ ខែឧសភា ឆ្នាំ២០១៧ ក្នុងនោះរួមមានៈ ១)ពលបាលឯក (ឋានន្តរស័ក្តពិតប្រាកដ អនុសេនីយ៍ទោ) អ៊ឹម សំ បុគ្គលិកបើកបរ ប៊ុលដូស៊ែរ ២) អនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យគុណភាព ៣) ពលបាលឯក មុំ តុលា (ព្រិន្ទបាលទោ) ជំនួយការបើកបរអេស្ការវ៉ាទ័រ និង ៤) អនុសេនីយ៍ត្រី ម៉ៅ អេង (អនុសេនីយ៍ឯក) បុគ្គលិកពេទ្យ។
ទាក់ទងនឹងថវិកាវិញ បើតាមនាយឧត្ដមសេនីយ៍ សែម សុវណ្ណី អគ្គនាយកនៃមជ្ឈមណ្ឌលជាតិកងកម្លាំងរក្សាសន្តិភាព និងបោសសម្អាតកាកសំណល់សង្គ្រាមបានឲ្យដឹងនាពេលថ្មីនេះថា នៅពេលកន្លងមក ទ័ពមួកខៀវកម្ពុជាដែលបានពលីជីវិតក្នុងបេសកកម្មមនុស្សធម៌នេះ UN បានផ្ដល់ ៧ម៉ឺនដុល្លារ ដល់ក្រុមគ្រួសារសពនីមួយៗ ហើយរដ្ឋាភិបាលកម្ពុជាវិញនឹងផ្ដល់បើកប្រាក់បន្ថែមតាមរបបនៃឋានន្តរសក្ដិរបស់ពួកគេ។ ដោយឡែកកាលពេលថ្មីនេះដែរ កាកបាទក្រហមកម្ពុជាក៏បាននាំយកគ្រឿងបរិភោគនិងថវិកា៥០០០ ដុល្លារជូនដល់ផ្ទះក្រុមគ្រួសារសពទាំង៤រូបនោះផងដែរ។
