រាជធានីភ្នំពេញ៖ បងប្រុសសម្តេចនាយករដ្ឋមន្ត្រីកម្ពុជា លោក ហ៊ុន សាន បានស្នើសុំឲ្យសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចាត់វិធានការយ៉ាងម៉ឺងម៉ាត់ចំពោះ អគ្គស្នងការរងនគរបាលជាតិ លោក ម៉ក់ ជីតូ ពាក់ព័ន្ធបញ្ហាវិវាទដីធ្លីជិត ១២០ហិតា នៅក្រុងប៉ោយប៉ែត។
យោងតាមលិខិតរបស់ លោក ហ៊ុន សាន ដែលមានចារដោយសម្ដេច ស ខេង នៅថ្ងៃទី០៥ ខែ ឧសភា ឆ្នាំ២០១៧ ដើម្បីផ្ញើជូនបន្តឲ្យអគ្គស្នងការរដ្ឋបាលមុខការនោះបានបញ្ជាក់ថា កាលពីពេលថ្មីៗនេះ មន្ត្រីរបស់សម្ដេច ស ខេង ចេះតែមកគំរាមគំហែងមកលើរូបខ្ញុំ ក្រុមគ្រួសាររបស់ខ្ញុំ និងសហការីខ្ញុំ ដែលបានចុះអភិវឌ្ឍលើដីខ្ញុំ នៅចំណុចភូមិព្រៃគប់ សង្កាត់ផ្សារកណ្ដាល ក្រុង ប៉ោយប៉ែត ខេត្តបន្ទាយមានជ័យ ទំហំ ១១៩ហិតា។
ក្នុងស្ថានភាពបែបនេះ សូមសម្ដេចក្រឡាហោម មេត្តាណែនាំទៅ លោក ម៉ក់ ជីតូ ដែលតែងតែការពារជនល្មើសក្នុងការរំលោភយកដីរបស់គ្រួសារលោក ដែលធ្វើឲ្យបាត់បង់ភាពកក់ក្តៅ ធា្លក់ចុះនូវប្រជាប្រិយភាព បាត់បង់សាមគ្គីផ្ទៃក្នុង ជំនឿទុកចិត្តក្នុងជួរគណបក្សប្រជាជន ពិសេសក្រុមគ្រួសារថ្នាក់ដឹកនាំប្រទេស។
លិខិតដដែលលោក ហ៊ុន សាន ក៏បានជំរុញឲ្យសម្ដេច ស ខេង ចាត់វិធានយ៉ាងម៉ឹងម៉ាត់ចំពោះមន្រ្តីរូបនេះ ដែលតែងតែប្រើអំណាចកៀបសង្កត់ជិះជាន់អ្នកស្លូតត្រង់ ដើម្បីផលប្រយោជន៍ខ្លួន និងបក្ខពួកខិលខូចមួយក្តាប់តូច ដែលតែងតែរំខានដល់ការរស់នៅ សុខសាន្តរបស់ក្រុមគ្រួសារខ្ញុំដ៏ដូចជាពលរដ្ឋទូទៅផងដែរ។
