សិល្បៈ ៖ គម្រោងចេញសម្ដែងនៅប្រទេសអូស្ត្រាលីរបស់តារាចម្រៀងកញ្ញា ង៉ែត សូរង្សី បានរៀបចំឡើងមានរយៈពេលប្រមាណជាងពីរខែមកហើយ ទើបតែនៅពេលនេះបំណងប្រាថ្នារបស់នាងបានសម្រេចហើយ ខណៈដែលម្ចាស់ស្ពនស័រនៅអូស្ត្រាលីបានចេញ Trailerកម្មវិធីប្រព្រឹត្តទៅនៅខែមិថុនាខាងមុខ។
គួរបញ្ជាក់ដែរថា គម្រោងចេញសម្ដែងក្រៅស្រុកលើកដំបូងរបស់ ង៉ែត សូរង្សី មានរយៈពេលមួយខែទើបនាងបញ្ចប់ការងារត្រូវវិលត្រឡប់មកស្រុកវិញ។ ប៉ុន្តែសម្រាប់ការទាក់ទងធានាចេញសម្ដែងនៅប្រទេសផ្សេងទៀត ង៉េត សូរង្សី មានអ្នកទាក់ទងច្រើន ប៉ុន្តែតារាស្រីវ័យក្មេងរូបនេះមិនហ៊ានទទួលយកដោយសារនាងមិនមានទំនុកទុកចិត្ត ព្រោះពុំធ្លាប់ដើរផ្លូវឆ្ងាយតែម្នាក់ឯង ដោយគ្មានសាច់ញាតិនោះទេ។
គម្រោងចេញសម្ដែងជើងទីមួយរបស់ ង៉ែត សូរង្សី នេះបើតាមការបញ្ជាក់ពីក្រុមការងារអង្គការ Save Cambodian Children Fund Australia បានបង្ហើបថា សម្រាប់វត្តមាន ង៉ែត សូរង្សី នាងអាចទទួលបានជោគជ័យខ្លាំង ព្រោះនាងមានបងប្អូនខ្មែរនៅអូស្ត្រាលី
ស្គាល់ និងដឹងពីសមត្ថភាពនាងច្រើន ហើយក៏មានអ្នករង់ចាំការបង្ហាញវត្តមានរបស់នាងច្រើនផងដែរ ដូច្នេះហើយគួបផ្សំដៃគូសម្ដែងក្នុងកម្មវិធីសុទ្ធតែជាតារាល្បីទៀតនោះពិតជាធ្វើឲ្យការងារនេះជោគជ័យខ្លាំងជាក់ជាមិនខាន៕
