យោងតាមការចុះផ្សាយរបស់សារព័ត៌មានរុស្ស៊ី (RT) នៅថ្ងៃចន្ទ ទី២៩ ខែឧសភា ឆ្នំា២០១៧នេះ រដ្ឋមន្រ្តីការពារជាតិសហរដ្ឋអាមេរិក លោក James Mattis បានចេញសេចក្ដីព្រមានទៅកាន់លោក គីម យុងអ៊ុន ថាជាមេដឹកនាំមហាចង្រៃ និងថែមទាំងបានគំរាមប្រឈមមុខយោធាដាក់គ្នាទៀតផង។
លោក James Mattis និយាយសំដៅទៅកាន់រដ្ឋាភិបាលទីក្រុងព្យុងយ៉ាងថា ជាមេដឹកនាំមហាចង្រៃ (Catastrophic)ដែលចូលចិត្តបង្ករឿងឈ្លោះ គំរាមកំហែងប្រទេសជិតខាងតាមរយៈអំណាចនុយក្លេអ៊ែររបស់ខ្លួន។ លើសពីនេះលោករដ្ឋមន្ត្រីខាងលើបានចំអកទៅឲ្យកូរ៉េខាងជើងថា ទីក្រុងព្យុងយ៉ាងមានត្រឹមតែកាំភ្លើងធំរាប់រយដើមប៉ុណ្ណោះ ហើយកាំជ្រួចដែលបានបាញ់កន្លងមកនោះ វាមិនអាចហោះហួសពីទីក្រុងកូរ៉េខាងត្បូងឡើយ៕
គួរបញ្ជាក់ផងដែរថា ការព្រមានលាយឡំនឹងការចំអករបស់រដ្ឋមន្រ្តីការពារជាតិអាមេរិកខាងលើនេះ ត្រូវបានលេចឡើងបន្ទាប់ពី កូរ៉េខាងជើង បានបាញ់សាកល្បងមីស៊ីលរបស់ខ្លួនមួយគ្រាប់ទៀតឈ្មោះ Scud ដែលមានរយៈចម្ងាយ ៤៥០គីឡូម៉ែត្រ ធ្លាក់ចូលក្បែរតំបន់សេដ្ឋកិច្ចរបស់ជប៉ុនកាលពីព្រឹកមិញនេះ៕
