Pisey
ចាប់តាំងពី កូរ៉េខាងជើង អភិវឌ្ឍអាវុធនុយក្លេអ៊ែរ និងបានសាកល្បងរហូតដល់ ៥ លើក រួមជាមួយនឹងការរំលោភសិទ្ធិមនុស្ស គឺអាចឲ្យមហាអំណាច និងអង្គការសហប្រជាជាតិធ្វើការលុកលុយប្រទេសនេះបាន ប៉ុន្តែរឿងនេះមិនអាចកើតឡើងបានឡើយ ដោយមូលហេតុធំតែមួយគត់គឺ "ភូមិសាស្ត្រនយោបាយ" ។
ប្រទេស ចិន ដែលជាសម្ពន្ធមិត្តមានអំណាចបំផុត រយៈពេលជាង ៧០ ឆ្នាំ និងមានតែមួយរបស់ កូរ៉េខាងជើង ត្រូវតែការពារប្រទេសនេះរាល់បំណងលុកលុយទាំងឡាយ ហើយត្រូវតែចាត់ទុក កូរ៉េខាងជើង ជាតំបន់មិនអាចឈ្លានពានបាន ។ ចំណុចនេះធ្លាប់កើតឡើងហើយក្នុងសម័យសង្គ្រាម កូរ៉េ ឆ្នាំ ១៩៥០-១៩៥៣ ដោយប្រទេស ចិន បញ្ជូន កងទ័ព ចូលកូរ៉េខាងជើង រាប់លាននាក់ ទប់ទល់នឹងទាហាន អាមេរិក ណាតូ និង អង្គការសហប្រជាជាតិ ។
ប្រសិនបើសង្គ្រាមកើតឡើងទៅលើ កូរ៉េខាងជើង ប្រជាជននឹងសម្រុកចូលតំបន់ ម៉ាន់ជូរី បង្កចលាចលទូទាំងភាគខាងជើងប្រទេស ចិន ។ មួយទៀត បើបស្ចិមប្រទេសលុកលុយ កូរ៉េខាងជើង ការប្រកាន់ខ្ជាប់ស្ថានភាពបច្ចុប្បន្នរវាង ចិន និង អាមេរិក ស្ដីអំពីកោះតៃវ៉ាន់ក៏ប្រែប្រួល គឺចិនអាចលុកលុយកោះតៃវ៉ាន់ ជារឿងដែល អាមេរិក មិនចង់ឲ្យកើតមានសោះឡើយ ។
ក្រៅពីនេះ នៅមាន កូរ៉េខាងត្បូង ដែលពេលនេះចាត់ទុក ជនជាតិ កូរ៉េខាងជើង ជាប្រជាជនដទៃ ហើយបារម្ភថា ការបង្រួបបង្រួមកូរ៉េ នឹងធ្វើឲ្យពួកខូចខាត ប៉ុន្តែបើសង្គ្រាមបរាជ័យ កូរ៉េខាងត្បូង ជាអ្នករងគ្រោះធ្ងន់ធ្ងរជាងគេ ។ ដូច្នេះ ការលុកលុយ កូរ៉េខាងជើង អាចកើតឡើងបានលុះត្រាតែមានរដ្ឋប្រហារចេញពីក្នុងប្រទេស កូរ៉េខាងជើង ខ្លួនឯងប៉ុណ្ណោះ ។