កងនាវាចិនថ្មីៗនេះបានធ្វើការព្រមានទៅកាន់នាវាពិឃាតបំពាក់មីស៊ីលរបស់សហរដ្ឋអាមេរិក តាមរយៈពាក្យសំដី ដើម្បីឲ្យប្រទេសមហាអំណាចមួយនេះបោះបង់ចោលនូវប្រតិបត្តិការនាវាចរណ៍សេរីរបស់ខ្លួន ដោយនិយាយ នឹងមានការប៉ះទង្គិចគ្នា នៅក្បែរកោះសិប្បនិម្មិត ក្នុងសមុទ្រចិនខាងត្បូង ប្រសិនបើនាវាប្រយុទ្ធអាមេរិកនៅតែបន្តដំណើរខិតកាន់តែកៀក។
រដ្ឋមន្ត្រីក្រសួងការពារជាតិ និងក្រសួងការបរទេសចិន កាលពីថ្ងៃព្រហស្បតិ៍ម្សិលមិញបានពិភាក្សាគ្នាចាត់វិធានការ ដើម្បីទប់ស្កាត់នាវាពិឃាតអាមេរិកមួយគ្រឿងប្រភេទ USS Dewey ដែលកំពុងមានវត្តមានក្នុងតំបន់មានជម្លោះ រយៈចម្ងាយ ១២ម៉ាយ ពីតំបន់ប្រជុំកោះ Spratly Islands។ ទីក្រុងប៉េកាំងបានជូនដំណឹងនេះទៅកាន់រដ្ឋាភិបាលអាមេរិករួចហើយ អំពីឯកតោភាគីរបស់របស់ខ្លួន នៅលើតំបន់មានជម្លោះ ដោយទាមទារឲ្យដកថយវិញជាបន្ទាន់ជៀសវាងការប្រឈម។
ជាចុងក្រោយអ្នកនាំពាក្យក្រសួងការបរទេសចិនលោក Lu Kang បានលើកឡើងថា សកម្មភាពរបស់អាមេរិកនាពេលបច្ចុប្បន្ន កំពុងបង្កហេតុតាមរយៈផ្លូវទឹក និងអាកាស ជាហេតុអាចនឹងធ្វើឲ្យប៉ះពាល់ ដល់តំបន់មហាសេដ្ឋកិច្ចសមុទ្រចិនខាងត្បូង នៅថ្ងៃណាមួយជាមិនខាន។ យ៉ាងណាមិញទីក្រុងវ៉ាស៊ីនតោនក៏បានចោទប្រកាន់វិញដែរថា ចិនកំពុងប្រកាន់ឯកតោភាគីនៅលើតំបន់មានជម្លោះ ប៉ុន្តែមិនបានបញ្ជាឲ្យឈប់ធ្វើប្រតិបត្តិការនាវាឡើយ៕
ប្រភព៖ ibtimes
