គណៈកម្មការរៀបចំការបូជាសពបានសម្រេចថា ការបូជាសពអតីតមហាក្សត្រ ភូមិបុល អាឌុលយ៉ាដេត នឹងធ្វើឡើងនៅថ្ងៃព្រហស្បតិ៍ទី ២៦ ខែ តុលា ឆ្នាំ ២០១៧ ធ្វើឡើងនៅលើវាលមេរុ សាណាមលឿង ជាកន្លែងតែងបូជាសពរាជវង្សរបស់ប្រទេស ថៃ ស្ថិតនៅនៅជ្រុងខាងជើងមហាប្រាសាទ និងជាពិធីធំបំផុតមួយត្រូវចំណាយប្រាក់ប្រមាណមួយពាន់លានបាត ស្មើនឹង ៤០ លានដុល្លារអាមេរិក ។ ឈាបនដ្ឋាន មានរោងចំនួន ៨ ព័ទ្ធជុំវិញ មានដំបូលស្រួច ដំណាងឲ្យភ្នំទាំង ៨ នៅព័ទ្ធជុំវិញភ្នំព្រះសុមេរុ ចំណែកសសរទាំងអស់ទ្រដោយរូបគ្រុឌ ដែលជាយានរបស់ព្រះវិស្ណុ ។
ក្រោយសាងសង់រួច ឈាបនដ្ឋានសម្រាប់បូជាសពអតីតព្រះមហាក្សត្រ នឹងមានកម្ពស់ ៥០ ម៉ែត្រកន្លះ គឺខ្ពស់ជាងឈាបនដ្ឋានបូជាសពអតីតព្រះមហាក្សត្រ ចូឡាលុងកន ដែលសោយទីវង្គតក្នុងឆ្នាំ ១៩១០ ។ តាមជំនឿរបស់សាសនា ហ៊ីនឌូ ឈាបនដ្ឋាន ដំណាងឲ្យភ្នំព្រះសុមេរុ ដែលស្ថិតនៅចំកណ្ដាលទ្វីប ។ មហាក្សត្រ ភូមិបុល អាឌុលយ៉ាដេត ឬ ស្ដេចរាមាទី ៩ សោយទិវង្គតនៅថ្ងៃទី ១៣ ខែ តុលា ឆ្នាំ ២០១៦ ក្នុងព្រះជន្ម ៨៨ វស្សា និងជាមហាក្សត្រដែលសោយរាជយូរបំផុតលើពិភពលោក ចាប់តាំងពីឆ្នាំ ១៩៤៦ ដល់ឆ្នាំ ២០១៦ មានរយៈពេល ៧០ ឆ្នាំ ។
មហាក្សត្របច្ចុប្បន្ន ព្រះមហាវ៉ាជិរ៉ាឡុងកន បានបញ្ជាឲ្យរៀបចំការប្រគុំតន្ត្រី ដើម្បីឧទ្ទិសដល់អតីតមហាក្សត្រព្រោះអតីតមហាក្សត្រជាព្រះរាជាដែលមានជំនាញខាងតន្ត្រី ដូច្នេះ ចាប់ពីពេលនេះតទៅរហូតដល់ថ្ងៃបូជាសព មានការប្រគំតន្ត្រីសម្ដែងដោយក្រុមតន្ត្រីយោធា ធ្វើឡើងរៀងរាល់ថ្ងៃសៅរ៍ នៅឯ Royal Plaza ខាងមុខប្រាសាទ តុសិត ។
