អគ្គរដ្ឋទូតកូរ៉េខាងជើង ប្រចាំនៅទីក្រុងប៉េកាំង ប្រទេសចិន បានឲ្យដឹងកាលពីថ្ងៃចន្ទ ទី១៥ ខែឧសភាម្សិលមិញថា ទីក្រុងព្យុងយ៉ាងនឹងបន្តការបាញ់សាកល្បងមីស៊ីលផ្លោងឆ្លងទ្វីបរបស់ខ្លួន ជាបន្តបន្ទាប់គ្រប់ពេលវេលា គ្រប់ទីកន្លែង ដោយមិនញញើតការព្រមានរបស់សហរដ្ឋអាមេរិក ឬដំណោះស្រាយនៃអង្គការសហប្រជាជាតិឡើយ។ នេះបើតាមការចេញផ្សាយដោយសារព័ត៌មាន Reuters។
អគ្គរដ្ឋទូតកូរ៉េខាងជើង លោក Ji Jae Ryong បានសង្កត់ធ្ងន់ថា "កូរ៉េខាងជើងនឹងធ្វើតេស្តមីស៊ីលផ្លោងឆ្លងទ្វីប ICBM គ្រប់ពេលវេលា គ្រប់ទីកន្លែង ខណៈមានបទបញ្ជាពីមេដឹកនាំលោក គីម ជុងអ៊ុន"។ ដោយការបាញ់អាវុធនុយក្លេអ៊ែរនេះ ប្រទេសផ្ដាច់ការមួយនេះនឹងធ្វើឡើងដោយមិនកោតខ្លាចភាគីណាមួយឡើយ ជាពិសេសគឺរដ្ឋាភិបាលអាមេរិក លោក ដូណាល់ ត្រាំ និងអង្គការសហប្រជាជាតិ (UN) ជាដើម។
គួរបញ្ជាក់ផងដែរថា ការលើកឡើងខាងលើនេះ បន្ទាប់ទីក្រុងព្យុងយ៉ាង ប្រកាសពីភាពជោគជ័យនៃការបាញ់សាកល្បងមីស៊ីលម៉ាក Hwasong-12 សមត្ថភាពបំពាក់ក្បាលគ្រាប់នុយក្លេអ៊ែរ ដែលមានរយៈចម្ងាយមធ្យម កម្ពស់ ២.១១១,៥គីឡូម៉ែត្រ និងហោះបានចំងាយ ៧៨៧ គីឡូម៉ែត្រ កាលពីថ្ងៃអាទិត្យកន្លងទៅ។ ទន្ទឹមគ្នានឹងទង្វើដ៏ផ្គើននេះ សហរដ្ឋអាមេរិក និងជប៉ុន បូករួមទាំង ក្រុមក្រុមប្រឹក្សាសន្តិសុខ អង្គការសហប្រជាជាតិ នឹងបើកកិច្ចប្រជុំជាបន្ទាន់មួយ នៅថ្ងៃអង្គារនេះ ដើម្បីចាត់វិធានការឆ្លើយតប៕
