ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា រូបលោកមិនមែនជាអ្នកដែលស្ថិតក្រោយការស៊ើបអង្កេតរបស់ក្រុម FBI នោះទេ ដោយការលើកឡើងនេះបានធ្វើឡើង បន្ទាប់ពីប្រធាន FBI លោក James Comey ត្រូវបានរដ្ឋាភិបាលអាមេរិកបណ្ដេញចេញពីតំណែង។
ក្នុងកិច្ចសម្ភាសន៍ជាមួយទូរទស្សន៍ NBC លោក ត្រាំ សង្កត់ធ្ងន់ថា ការបញ្ឈប់ការងាររបស់ប្រធានភ្នាក់ងារស៊ើបអង្កេត FBI គឺជាការសម្រេចចិត្តផ្ទាល់របស់លោក ដោយអះអាងថា លោក James Comey បានដឹកនាំស៊ើបអង្កេតខុសឆ្គងមួយ ដែលបង្ហាញថា ខ្លួនមានជាប់ពាក់ព័ន្ធជាមួយរុស្ស៊ី ក្នុងអំឡុងពេលបោះឆ្នោតជ្រើសរើសប្រធានាធិបតី ក្នុងឆ្នាំ២០១៦។
ស្របគ្នានេះដែរ លោកប្រធានាធិបតី បានចោទសួរទៅកាន់លោក Comey ថា "រឿងអីដែលគាត់ ត្រូវស្ថិតក្រោមការស៊ើបអង្កេតរបស់ក្រុម FBIនោះ? ប្រសិនបើអាច សូមប្រាប់ខ្ញុំត្រង់មកថា ខ្ញុំកំពុងស្ថិតក្រោមការស៊ើបអង្កេត បើពុំនោះទេអ្នកមិនត្រូវធ្វើការនេះឡើយ"។
គួររម្លឹកផងដែរថា ក្រោយពេលបណ្ដេញប្រធាន FBI ចេញពីតំណែង លោកប្រធានាធិបតី ដូណាល់ ត្រាំ បានបញ្ជាក់ថា រដ្ឋាភិបាលរុស្ស៊ីជាមនុស្សមានល្បិចកល រឿងអីដែលរូបលោកមានជាប់ពាក់ព័ន្ធទំនាក់ទំនងជាមួយនោះ ពោលគឺថា គ្មានអ្វីត្រូវធ្វើជាមួយរុស្ស៊ីឡើង ក្នុងអំឡុងពេលបោះឆ្នោតកន្លងទៅ៕
ប្រភព៖ BBC
