Sergio Romero ត្រូវបានក្លឹប Inter Milan ផ្ដល់កិច្ចសន្យា២ឆ្នាំឲ្យចាកចេញពី Manchester United នេះ បើតាមប្រភពកាសែតពីប្រទេសអ៊ីតាលីបានបញ្ជាក់ កាលពីប៉ុន្មានម៉ោងមុននេះ។
អ្នកចាំទីជម្រើសជាតិអាហ្សង់ទីន មិនអាចដណ្ដើមកៅអីជម្រើសដំបូងពី David De Gea បានទេ ចាប់តាំងចាកចេញពីក្លឹប Sampdoria កាលពីឆ្នាំ ២០១៥ ក្នុងលក្ខខណ្ឌគ្មានតម្លៃខ្លួន តែរូបគេបានចូលលេងក្នុងពានរង្វាន់ធំជាច្រើនដែរមានដូចជា៖ Europa League និង AF Cup។
តាមប្រភព Mediaset Premium ក្លឹប Milan ចង់បានគាត់ តែយ៉ាងណារូបគេនៅតែមានជម្រើសទី២ក្រោយអ្នកចាំទី Samir Handanovic នៅទឹកដី San Siro ដដែល។ Romero នៅសល់កុងត្រាជាមួយបិសាចក្រហមដល់ឆ្នាំ២០១៩ ប៉ុន្តែតាមរបាយការណ៍ រូបគេនឹងទៅលេងនៅទីនោះ ក្រោយរូបគេបានទិញផ្ទះមួយខ្នងនៅអ៊ីតាលីរួចហើយ។
ក្រុមគូរប្រជែងរួមទីក្រុង AC Milan ក៏ត្រូវបានគេជឿថាចាប់អារម្មណ៍កីឡាករវ័យ៣០ឆ្នាំរូបនេះដែរ បន្ទាប់ពីបង្ហាញខ្លួនឲ្យ Man Utdក្រោមការដឹកនាំរបស់ Jose ១៧ប្រកួតក្នុងរដូវកាលនេះ។ តែយ៉ាងណា AC Milan នៅតែទុកដៃទីមួយឲ្យទៅ Gianluigi Donnarumma ទោះបីចង់បាន Sergio Romero ក៏ដោយ៕
