មនុស្សយ៉ាងហោចណាស់២០នាក់បានស្លាប់ និងរាប់សិបនាក់ផ្សេងទៀតរងរបួស ក្នុងហេតុការផ្ទុះឃ្លាំងអាវុធដ៏ធំមួយរបស់ក្រុមសកម្មប្រយុទ្ធ ISIS ដែលស្ថិតនៅភាគខាងកើត នៃខេត្តDeir al Zour ប្រទេសស៊ីរី កាលពីល្ងាចថ្ងៃពុធម្សិលមិញ។ នេះបើតាមការចេញរបស់ទីភ្នាក់ងារសារព័ត៌មានចិន ស៊ិនហ៊ូ នៅមុននេះបន្តិច។
យោងតាមសេចក្ដីរាយការណ៍ពីអង្គការឃ្លាំមើលសិទ្ធិមនុស្ស ប្រចាំនៅស៊ីរី បានឲ្យដឹងថា ហេតុការណ៍ផ្ទុះដ៏កក្រើកនេះបានកើតឡើងចំនួន២ដងជាប់ៗគ្នា ចំពេលដែលរថយន្តដឹកសាំង ជាច្រើនគ្រឿងបានបើកចូលទៅកាន់ក្បែរភាគខាងកើត ក្នុងខេត្ត Deir al Zour បណ្ដាលឲ្យផ្ទះប្រជាជនសរុបចំនួន ១៥ខ្នង និងរថយន្តជាច្រើនគ្រឿងផ្សេងទៀតត្រូវបានខូចខាង។
ប្រភពខាងលើបានបញ្ជាក់ទៀតថា យ៉ាងហោចណាស់មានមនុស្ស ២០នាក់បានស្លាប់ និងរាប់សិបនាក់ដ៏ទៃទៀតរងរបួស។ យ៉ាងណាមិញគេនៅពុំទាន់ដឹងច្បាស់ថា ការផ្ទុះឃ្លាំងអាវុធដ៏រន្ធត់នេះ បណ្ដាលមកពីមូលហេតុអ្វី ឬអ្នកណាមួយជាបង្កឡើងឡើយ៕
