មេបញ្ជាការក្រុមជ្រុលនិយមរដ្ឋឥស្លាម (ISIS) មួយរូប ឈ្មោះ Abdul Hasib ដែលបានធ្វើសកម្មភាពវាយប្រហារភេរវកម្មនៅក្នុងប្រទេស អាហ្គានីស្ថាន ពេលនេះត្រូវបានរាយការណ៍មកថា បានស្លាប់ភ្លាមៗនៅនឹងកន្លែង ចំពេលធ្វើប្រតិបត្តិការយោធាជាមួយកងកម្លាំងពិសេសអាហ្គានីស្ថាន និងសហរដ្ឋអាមេរិក។
អ្នកនាំពាក្យរបស់ទីស្នាក់ការការពារជាតិ Pentagon លោក Captain Jeff Davis បានប្រកាសថា មេដឹកនាំ ISIS លោក Abdul Hasib ត្រូវបានគេបាញ់សម្លាប់ ខណៈប៉ះទង្គិចគ្នាជាមួយក្រុមកងកម្លាំងពិសេសរបស់ប្រទេសអាហ្គានីស្ថាន និងសហរដ្ឋអាមេរិក នៅក្នុងខេត្ត Nagngarhar ភាគខាងកើត។ មេខ្លោងរូបនេះត្រូវបានគេជឿជាក់ថា ជាមនុស្សនៅពីក្រោយផែនការការវាយប្រហារគ្រប់ទម្រង់ ជាពិសេសគឺបានបើកការវាយប្រហារទៅលើមន្ទីរពេទ្យក្រុងកាប៊ុល ដែលបានសម្លាប់មនុស្សសរុប ៣០នាក់ កាលពីខែមីនាកន្លងទៅ។
គួរបញ្ជាក់ផងដែរថា លោក Abdul Hasib ត្រូវទទួលរងការវាយប្រហារដ៏ធ្ងន់ធ្ងរ ដោយការទម្លាក់គ្រាប់បែកទៅលើទីតាំងរូងក្រោមដីមួយកន្លែងរបស់ក្រុម ISIS ក្នុងប្រទេសអាហ្គានីស្ថាន ពីសំណាក់
ទ័ពពិសេសអាមេរិក សហការជាមួយអាហ្គានីស្ថាន កាលពីពីរសប្ដាហ៍កន្លងទៅ មកដល់ពេលនេះទើបកងកម្លាំងរដ្ឋាភិបាលបង្ហើបឲ្យដឹងថា មេភេរវកម្មរូបនេះបានស្លាប់ហើយ៕
