រាជធានីភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ ជ ប ថា ខ្លួននឹងរាប់សន្លឹកឆ្នោតឡើងវិញនូវការិយាល័យបោះឆ្នោត ចំនួន ០៩ ក្នុងឃុំបឹងប្រាំ នៃខេត្តបាត់ដំបង នៅព្រឹកថ្ងៃពុធ ស្អែកនេះ នាទីស្តីការ គ ជ ប។ នេះបើយោងតាម អ្នកនាំពាក្យ គ ជ ប បានឲ្យដឹងកាលពីម្សិលមិញ។
គួរបញ្ជាក់ផងដែរថា កាលពីថ្ងៃទី១២ មិថុនា ម្សិលមិញ គ ជ ប បានចាប់ផ្ដើមរាប់សន្លឹកឆ្នោតឡើងវិញនូវការិយាល័យចំនួន២៣ នៃឃុំដូង ស្រុករមាសហែក ខេត្តស្វាយរៀង បន្ទាប់ពីមានបណ្ដឹងពីគណបក្សធំៗទាំងពីរបានស្នើឲ្យរាប់ឡើងវិញ។
ក្នុងការរាប់សន្លឹងឆ្នោតតាមការិយាល័យនៃឃុំដូងឡើងវិញនេះ គេសង្កេតឃើញថា មានបញ្ហាចម្រូងចម្រាស់ខ្លាំងដែលពាក់ព័ន្ធនឹងសន្លឹកឆ្នោតមានភាពមិនប្រក្រតី។ ភាពមិនប្រក្រតីនោះគឺនៅត្រង់សន្លឹកឆ្នោតមានការគូសសញ្ញាលើសពីមួយ សរសេរអក្សរ-លេខ មានចុះហត្ថលេខា និងមានស្នាមប្រឡាក់ជាដើម។
