ខេត្តឧត្តរមានជ័យ៖ ពលរដ្ឋខ្មែរ ១៩នាក់ទៀត លួចឆ្លងដែនទៅកាប់ឈើ ក្រញូងនៅក្នុងទឹកដីថៃ ត្រូវបានទាហ៊ានថៃបាញ់ប្រហារកាលពីថ្ងៃទី២០ ខែមិថុនា ឆ្នាំ២០១៧ វេលាម៉ោង១៥និង៣០នាទី នៅចំណុចទល់មុខ បង្គោលសីម៉ាលេខ៧ ស្ថិតនៅភូមិសាមគ្គី ឃុំត្រពាំងប្រិយ៍ ស្រុកអន្លង់វែង។
បើតាមមន្ត្រីអគ្គស្នងការនគរបាលជាតិបានឲ្យដឹងថា ក្នុងចំណោមពលរដ្ឋខ្មែរទាំង១៩នាក់ខាងលើ មានពីរនាក់រងបួសធ្ងន់ ខណៈ ១៧នាក់ផ្សេងទៀតបានរត់រួចគ្មានរបួស។ ជនរងគ្រោះទាំងពីរ រួមមាន ទី១-ឈ្មោះ អឿន កំសាន ប្រុស អាយុ ២៧ឆ្នាំ មុខរបរជាទាហាន សឹករងអន្លង់វែង អង្គភាពខ១ គ៧ របួសដៃស្តាំ ហើយបច្ចុប្បន្ន សម្រាកព្យាបាលក្នុងបន្ទាយ គ៧។
ទី២-ឈ្មោះ ហន់ ដានិត ភេទ ប្រុស អាយុ ១៧ ឆ្នាំ ត្រូវរបួសជើងខាងស្តាំពីរកន្លែង (បាញ់ ត្រូវលើក្បាលជង្គង់មួយគ្រាប់ និងក្រោមក្បាលជង្គង់មួយគ្រាប់) មុខរបរជាប្រជាពលរដ្ឋ រស់ ភូមិសាមគ្គី ឃុំ ត្រពាំងប្រិយ៍ ស្រុកអន្លង់វែង (បាត់ខ្លួននៅកន្លែងកើតហេតុ)។
ប្រភពដដែលបន្តថា លុះដល់ថ្ងៃទី២៣ ខែមិថុនា ឆ្នាំ២០១៧ មានប្រជាពលរដ្ឋថៃ មករកផ្សិតបានប្រទះឃើញ ជនរងគ្រោះនៅក្នុងព្រៃ ហើយបានមកប្រាប់ប្រជាពលរដ្ឋខ្មែរ រួចបាននាំគ្នា សែងចុះពីលើភ្នំ មកដល់ភូមិសាមគ្គី នៅវេលាម៉ោង១៦និង៣០នាទី ថ្ងៃដដែលហើយបច្ចុប្បន្នជនរងគ្រោះបញ្ជូនទៅសម្រាកព្យាបាលគ្លីនិកឯកជន៕
