រាជធានីភ្នំពេញ៖ ករណីបាញ់បុរសម្នាក់ជាអ្នករត់រ៉ឺម៉កកង់បី កាលពីយប់មិញ អគ្គស្នងការនគរបាលជាតិបានដាក់សង្ស័យថា ជាករណីឌឺដង ទំនាស់ពាក្យសម្តីគ្នានិងបណ្តាលមកពីស្រវឹង។ នេះយោងតាម លោកឧត្តមសេនីយ៍ សុង លី ស្នងការរងនគរបាលរាជធានីភ្នំពេញ បានឲ្យដឹងនៅព្រឹកថ្ងៃទី២៤ ខែមិថុនា ឆ្នាំ២០១៧នេះ។
ដោយឡែកលោកវរសេនីយ៍ទោ ហ៊ាង ថារ៉េត អធិការរងនគរបាលខណ្ឌចំការមនបានឲ្យដឹងថា កាលពីថ្ងៃទី២៣ ខែមិថុនា ឆ្នាំ២០១៧ វេលាម៉ោង២៣និង៤០នាទីមានករណីបាញ់សម្លាប់បុរសម្នាក់ នៅមុខផ្ទះលេខ២០៦A ផ្លូវ នរោត្តម ក្រុម៣៩ ភូមិ៨ សង្កាត់ទន្លេបាសាក់ ខណ្ឌចំការមន។
អធិការរូបនេះបន្តថា ជនល្មើសវិញមិនបានស្គាល់អត្តសញ្ញាណទេ គ្រាន់តែដឹងថា មានមាឌធំ ខ្ពស់ រាងស ពាក់មួកកន្តិប កាន់អាវុធខ្លីមិនស្គាល់ម៉ាកមួយដើម ពណ៌ស្រដៀងទឹកមាស ជិះម៉ូតូម៉ាក អាយខុន ពណ៌ផ្កា ស លាយខ្មៅ មិនចាំស្លាកលេខ។
ចំណែកជនរងគ្រោះឈ្មោះ ឡុច រីម ភេទ ប្រុស អាយុ២៧ឆ្នាំ ជនជាតិខ្មែរ មុខរបររត់រ៉ឺម៉កកង់បី ស្លាក់នៅផ្ទះជួលផ្លូវបេតុង ភូមិឫស្សី សង្កាត់ស្ទឹងមានជ័យ រាជធានីភ្នំពេញ មានស្រុកកំណើតនៅស្រុកបាភ្នំ ខេត្តព្រៃវែង ត្រូវជនល្មើសបាញ់ត្រូវចំខ្នងចំហៀងខាងឆ្វេង ធ្លាយទៅចំហៀងខ្លួនខាងស្តាំ។
បច្ចុប្បន្នកម្លាំងជំនាញកំពុងត្រួតពិនិត្យកាំមេរា ដើម្បីឈានទៅរកចាប់ខ្លួនជនល្មើសដើម្បីយកផ្ដន្ទាទោសតាមផ្លូវច្បាប់។
សូមរម្លឹកផងដែរ បើតាមសាក្សីឃើញហេតុការណ៍ផ្ទាល់ឲ្យដឹងកាលពីយប់ម្សិលមិញថា មុនពេលកើតហេតុជនរងគ្រោះជិះកង់បី មានគ្នា៣នាក់ ធ្វើដំណើរពីចាក់អង្រែ ត្រឡប់ទៅផ្សារទំនើបសូរិយា។ លុះមកដល់ក្បែរស្តុបចំការមន ជនដៃដល់ជិះម៉ូតូមកស្រែកឲ្យជនរងគ្រោះឈប់ ហើយក៏ឈ្លោះនិងវ៉ៃគ្នាទៅមក រួចក៏ជនសង្ស័យក៏ដល់ដកកាំភ្លើងបាញ់ពីក្រោយឲ្យស្លាប់តែម្តង។ ក្រោយពេលហេតុខ្មាន់កាំភ្លើងដែលជិះម៉ូតូ អាយខុន តែម្នាក់ឯងបានជិះម៉ូតូគេចខ្លួនបាត់ស្រមោលតែម្តង៕
