ជីវិតពិតជាមិនទៀតទាត់មែន ហើយការចាកចេញទៅរបស់ម្នាក់ៗ តែងតែធ្វើឲ្យបងប្អូន មិត្តភក្កិមានការអាឡោះអាល័យជាពន់ពេក តែអ្វីដែលកាន់តែក្ដុកក្ដួល និងមិននឹកស្មានជាងនេះទៀតនោះ គឺយោងតាមការបង្ហោះរបស់គណនីហ្វេសប៊ុកមួយឈ្មោះ Jino Tu បានរៀបរាប់អំពីករណីគ្រោះថ្នាក់ចរាចរណ៍មួយកាលពីថ្ងៃទី ១១ ខែ មិថុនា ឆ្នាំ ២០១៧ ល្ងាចមិញ នេះ ដែលបណ្ដាលឲ្យគូស្នេហ៍មួយគូស្លាប់យ៉ាងអាណោចអាធ័មជាមួយគ្នាតែម្ដង ។
ដែលបានបង្ហោះរៀបរាប់ដោយបានសរសេរថា “មិននឹកស្មានវានឹងកើតឡើងសោះ ប្អូនៗទាំងពីរនាក់ដែលជាគូនឹងគ្នាបានលាចាកទៅហើយ ដោយគ្រោះថ្នាក់ចរាចរណ៍កាលពីព្រឹកមិញ នៅស្រុកស្រែអំបិល ខេត្តកោះកុង សូមអោយវិញ្ញាណអ្នកទាំងពីរទៅអោយបានសុខ”
ប្រភពហ្វេសបុកខាងលើនេះបានបន្តទៀតថា “ប្អូនទាំងពីរស្រឡាញ់គ្នាយូរណាស់ដែរ មានគំរោងនឹងរៀបការជាមួយគ្នា មិត្តភក្តិបងប្អូនរងចាំថ្ងៃល្អរបស់ពួកគាត់ទាំងពីរ តែអកុសលពួកគាត់ទាំងពីរបានលាចាកមិត្តភក្តិ បងប្អូនទៅហើយ ។ ទោះពួកគាត់មិនមានជីវិតក៏ដោយ តែចុងក្រោយប្អូនទាំងពីរបានស្លៀកពាក់ជាកូនកំលោះ ក្រមុំ ដោយប៉ាម៉ាក់និងបងប្អូនទាំងសងខាងដឹងលឺ គឺបានធ្វើវាឡើងដើម្បីបំពេញនូវក្តីប៉ងប្រាថ្នារបស់ពួកគាត់ទាំងពីរពេលដែលនៅរស់ ។ សូមជាតិក្រោយកុំអោយដូចជាតិនេះណាប្អូន.. នេះពិតជាគូមែន”
