យន្តហោះប្រយុទ្ធរបស់អង្គការណាតូ (NATO) មួយគ្រឿង ត្រូវបានកងកម្លាំងអាកាសរុស្ស៊ីហោះប្រដេញតាម ខណៈដែលយន្តហោះនេះព្យាយាមហោះស៊ើបការណ៍មូលដ្ឋានទ័ពអាកាសទីក្រុងម៉ូស្គូ ។
យោធារុស្ស៊ីបានឲ្យដឹងថា ហេតុការណ៍នេះកើតឡើង ចំពេលដែលយន្តហោះប្រយុទ្ធណាតូហោះហើរឆ្លងកាត់ដែនអាកាសអន្តរជាតិ កំពង់ផែ Kaliningrad ក្នុងសមុទ្របាល់តិច ដែលត្រូវបានរដ្ឋមន្រ្តីក្រសួងការពារជាតិលោក Sergei Shoigu សម្រេចឲ្យកម្លាំងរបស់ខ្លួនហោះតាមប្រមាញ់ ក្រោយមកភាគីបង្កហេតុក៏ព្យាយាមគេចខ្លួនទៅឆ្ងាយ។
ទន្ទឹមគ្នានេះដែរណាតូបានឆ្លើយតបវិញថា ខ្លួនមិនបានហោះគេខ្លួននោះឡើយ ផ្ទុយទៅវិញពួកគេប្រយុទ្ធតទល់គ្នាជាមួយយន្តហោះចម្បាំងរុស្ស៊ីចំនួន ៣គ្រឿង ដែលធ្វើសកម្មភាពបំពាននៅតំបន់មានជម្លោះ។ យ៉ាងណាមិញទីក្រុងម៉ូស្គូអះអាងថា ណាតូកំពុងបង្កហេតុ ប្រឆាំងទៅលើសមុទ្របាល់តិច ទើបបង្ខំឲ្យមានការឆ្លើយតបបែបនេះ៕
គួរបញ្ជក់ផងដែរថា តាមការចុះផ្សាយរបស់ទីភ្នាក់ងារសារព័ត៌មានរុស្ស៊ី ហេតុការណ៍នេះបានកើតឡើងកាលពីថ្ងៃពុធ ទី២១ ម្សិលមិញ ដោយយន្តប្រយុទ្ធណាតូមួយគ្រឿងម៉ាក F-16 ហោះសំដៅទៅកៀកយន្តហោះចម្បាំងរបស់ក្រសួងការពារជាតិលោក Shoigu ជាហេតុធ្វើឲ្យយន្តហោះរុស្ស៊ីប្រភេទ Su-27 ធ្វើប្រតិកម្មវាយបកវិញភ្លាមៗ ខណៈដែល F-16 ព្យាយាមគេចខ្លួន៕
