ការប្រលងចម្រៀង The Voice Kids Cambodia នៅសប្ដាហ៍ទីពីរនេះ គឺកាន់តែធ្វើឲ្យទស្សនិកជនបានឃើញនូវសមត្ថភាព និងទេពកោសល្យដ៏អស្ចារ្យរបស់កុមារកម្ពុជាបន្តទៀត នៅក្នុងវិស័យសិល្បៈខ្មែរ ដែលកុមារទាំងអស់នោះ នឹងក្លាយទៅជាទំពាំងស្នងឫស្សីដ៏រឹងមាំថែមទៀត សម្រាប់សិល្បចម្រៀង ដើម្បីជំរុញបន្ថែមទៅកាន់ពិភពលោកថា កម្ពុជាពិតជាមិនខ្សត់ធនធានមនុស្សដែលពូកែៗនោះឡើយ។
ជាក់ស្ដែងនៅក្នុងសប្ដាហ៍ថ្ងៃសៅរ៍ម្សិលមិញនេះ នៅលើកញ្ចក់ទូរទស្សន៍រស្មីហង្សមាស កម្មវិធីលំដាប់ពិភពលោក The Voice Kids Cambodia រដូវកាលទី១ និងមានចាក់ផ្សាយឡើងវិញនៅយប់ថ្ងៃអាទិត្យ ទី៣០ ខែកក្កដា ឆ្នាំ២០១៧នេះ ទស្សនិកជនគ្រប់មជ្ឈដ្ឋាននូវតែបន្តទស្សនាមិនជិនណាយនូវសមត្ថភាពកុមារតូចម្នាក់មកពីខេត្តបាត់ដំបង ឈ្មោះ ពេជ្រ ថៃ រូបគេពិតជាធ្វើឲ្យគណៈកម្មការទាំងបីរូបដណ្ដើមគ្នាចង់បានជាកូនក្រុម ក៏ព្រោះតែជាក្មេងគួរឲ្យស្រឡាញ់ ទាំងសមត្ថភាពច្រៀង និងទេពកោសល្យនិយាយស្ដី។
កុមារតូចអាយុ១២ឆ្នាំម្នាក់នេះ មិនត្រឹមតែអាចឆក់យកបេះដូងអ្នកទស្សនានៅលើកញ្ចកទូរទស្សន៍តែប៉ុណ្ណោះនោះទេ សូម្បីតែនៅលើបណ្ដាញសង្គម Facebook, Youtube ក៏មានអ្នកចូលទស្សនារៀបលាននាក់ និងមានការកោតសរសើរនូវភាពទាក់ទាញរបស់គេ មិនដាច់ពីមាត់គ្រប់ៗគ្នា អាចនិយាយថា នៅសប្ដាហ៍ទី២នេះ ពេជ្រ ថៃ គឺជា Super Star ផងដែរ។
ចំណុចមួយទៀតដែលកាន់តែផ្ទុះខ្លាំងនោះ គឺមានព្រះតេជគុណមួយព្រះអង្គ ប្រើប្រាស់បណ្ដាញសង្គមហ្វេសប៊ុក ឈ្មោះថា Chhouk បានសរសេរសារបង្ហោះថា ខ្សែជីវិតលោកម្ចាស់មានភាពស្រដៀងគ្នាខ្លាំង ទៅនឹង ពេជ្រ ថៃ ហើយលោកក៏បានប្រកាសជួយឧបត្ថម្ភរាល់ការចំណាយលើសំលៀកបំពាក់សម្រាប់កុមារម្នាក់នេះ ឡើងច្រៀងនៅសប្ដាហ៍បន្តទៀត ទោះចំណាយអស់ប៉ុន្មានក៏ព្រះអង្គជួយដែរ សំខាន់បានឃើញការស្លៀកពាក់របស់គេនៅលើឆាកកម្មវិធីនោះឲ្យមានភាពលេចធ្លោរ។
គណនីហ្វេសប៊ុកខាងលើបានសរសេរដូច្នេះថា "ស្មេរនេះគ្រាន់តែខ្ញុំគិតថាជីវិតខ្ញុំ និងប្អូនប្រុសស្រដៀងគ្នា ម្ដាយឪពុកចេញទៅធ្វើការអស់រយៈពេល២៥ឆ្នាំ គឺគាត់ដាច់ទឹកដោះភ្លាម ម្ដាយឪពុកទៅចោលភ្លែត។ ដឹងក្ដីឡើង ឃើញតែយាយ ក៏យកយាយធ្វើម៉ែ។ សូមអ្នកដែលបានទាក់ទងជាមួយប្អូនប្រុសជួយប្រាប់គាត់ផង ខ្ញុំនឹងចេញថ្លៃសំលៀកបំពាក់គាត់ក្នុងវគ្គក្រោយមួយកំប្លេ ទោះអស់ថ្លៃប៉ុណ្ណាក៏ដោយ ឲ្យតែគាត់ស្លៀកពាក់មើលទៅលេចធ្លោនៅលើឆាកប្រឡង"។
គួររម្លឹកថា ព្រះតេជគុណមួយអង្គព្រះនាមក្នុងបណ្ដាញសង្គមខាងលើនេះបានសរសេររៀបរាប់ច្រើនជាងនេះ ដែលជាប្រវត្តិខ្សែជីវិតរបស់លោកផ្ទាល់ ហើយវាមានភាពស្រដៀងគ្នាខ្លាំងទៅនឹងប្អូនប្រុស ពេជ្រ ថៃ។ ចំណុចចាក់ចំបេះដូងនេះហើយ ដែលជំរុញទឹកព្រះទ័យគុណម្ចាស់ ប្រកាសរកអ្នកស្និតនឹងកុមារនោះ ដើម្បីបានឧបត្ថម្ភនូវសំលៀកបំពាក់មួយកំប្លេដល់រូបគេ ទោះត្រូវចំណាយប៉ុន្មាន ក៏សុខចិត្តចំណាយដែរ៕
