រាជធានីភ្នំពេញ៖ អគារបូឌិញ ស ជាសំណង់កសាងក្នុងអំឡុងទសវត្ស៦០ នៃសម័យសម្ដេចតា មកដល់ថ្ងៃទី១៧ ខែកក្កដា ឆ្នាំ២០១៧នេះ ត្រូវបានចាប់ផ្ដើមវាយកម្ទេចចោល ដើម្បីបើកផ្លូវដល់ការអភិវឌ្ឍថ្មីជាបន្តទៀត។
សូមបញ្ជាក់ថា ពលរដ្ឋដែលរស់នៅលើអគារ ប៊ូឌីញ សរុប ៤៩២គ្រួសារ បានយល់ព្រមទទួលយកសំណងក្នុងតម្លៃ ១៤០០ដុល្លារអាមេរិក ក្នុងមួយម៉ែត្រការ៉េ ដោយបើកផ្លូវឲ្យក្រុមហ៊ុនជប៉ុន ឈ្មោះ Arakawa ជាអ្នកវិនិយោគលើការអភិវឌ្ឍអគារ ប៊ូឌីញ នេះ ទៅជាអគារថ្មីកម្ពស់ ២១ជាន់ ដោយ ៣ជាន់ជាកន្លែងចតរថយន្ត ១ជាន់ជាកន្លែងហាងទំនិញ និង ៥ជាន់សម្រាប់ជាកន្លែងស្នាក់នៅ។
ក្រោមការដឹកនាំរបស់ឯកឧត្ដម ជា សុផារ៉ា រដ្ឋមន្ត្រីក្រសួងដែនដីនគរោបនីយកម្ម និងសំណង់ បានដោះស្រាយនូវចំណាត់ការដ៏ត្រឹមត្រូវលើគម្រោងអភិវឌ្ឍន៍នេះ ត្រូវបានគេសរសើរថាលោកបានធ្វើឲ្យប្រជាពលរដ្ឋអ្នករស់នៅលើអគារនេះទាំង ៤៩២ ម្ចាស់ចំណែកឯកជន បានយល់ព្រមទទួលយកសំណងគ្រប់ៗគ្នា ដើម្បីបើកផ្លូវដល់ការអភិវឌ្ឍដោយរលូនគ្មានភាពចម្រូងចម្រាសដូចគម្រោងដទៃទៀត នៅក្នុងទីក្រុងភ្នំពេញនោះឡើយ។
ព័ត៌មានចុងក្រោយ៖ យ៉ាងណាមិញ តាមការបញ្ជាក់ពីភ្នាក់ងារព័ត៌មានខេឃ្យូបដែលបានចុះទៅដល់ទីនោះផ្ទាល់បានរាយការណ៍មកថា អគារបូឌិញ ស នឹងត្រូវវាយកម្ទេចចោលនៅថ្ងៃទី១៨ ខែកក្កដា ឆ្នាំ២០១៧ស្អែកវិញ នៅថ្ងៃទី១៧នេះ គ្រាន់តែដឹកជញ្ជូននៅគ្រឿងចក្រ ទៅដាក់នៅទីនោះប៉ុណ្ណោះ៕
