ទោះបីជារដ្ឋាភិបាលអុីរ៉ង់ខំប្រឹងព្រមាន ឬទទូចអង្វរឲ្យសហរដ្ឋអាមេរិកបញ្ឈប់ការសម្ពាធមកលើទីក្រុងតេហេរ៉ង់យ៉ាងណាក៏ដោយ ទីក្រុងវ៉ាស៊ីងតោននៅតែប្រកាន់គោលជំហរដដែល លុះត្រាតែអុីរ៉ង់យល់ព្រមបោះបង់ចោលនូវកម្មវិធីមីស៊ីល ដែលរដ្ឋាភិបាលអាមេរិកយល់ថា ជាការគំរាមកំហែងសន្តិសុខ ប្រឆាំងនឹងកិច្ចព្រមព្រៀងនៃច្បាប់អន្តរជាតិ។
ជុំវិញបញ្ហានេះដែរ កាលពីម្សិលមិញ សភាអាមេរិកបានប្រកាសដាក់ទណ្ឌកម្មថ្មីមួយបន្ថែមទៀត បន្ទាប់ពីចោទប្រកាន់ថា ទីក្រុងតេហេរ៉ង់ជាអ្នកគាំទ្រសកម្មភាពរបស់ក្រុមសកម្មប្រយុទ្ធ ហើយការចោទនេះត្រូវបានរដ្ឋាភិបាលអុីរ៉ង់ច្រានចោលទាំងស្រុង ដោយព្រមានអាមេរិកមិនឲ្យដាក់បញ្ចូលកងទ័ពបដិវត្តន៍ IRG របស់ខ្លួនជា ក្រុមភេរវកម្មឡើយ។
គួរបញ្ជាក់ផងដែរថា ចំពោះទណ្ឌកម្មថ្មីលើកនេះ អាមេរិកបានធ្វើឡើងទៅលើក្រុមហ៊ុន ឯកជន និង រដ្ឋ ចំនួន១៨ ដែលអះអាងថា ទាំងនោះជាប្រភពនៃសេដ្ឋកិច្ចដ៏ធំរបស់អុីរ៉ង់ ក្នុងការអភិវឌ្ឍន៍កម្មវិធីនុយក្លេអ៊ែរ៕
