រាជធានីភ្នំពេញ៖ ចៅក្រមសាលាដំបូងរាជធានីភ្នំពេញលោក កោ វណ្ឌី នៅរសៀលថ្ងៃទី២៤ ខែកក្តដា ឆ្នាំ២០១៧ នេះ បានបើកសវនាការលើអង្គសេចក្តីក្នុងសំណុំរឿង ហិង្សាដោយចេតនានិងចែកចាយរូបអាសអាភាស ដែលមានជនជាប់ចោទឈ្មោះ គុយ សិទ្ធិសក្កិ ភេទប្រុស អាយុ២៦ឆ្នាំ មុខរបរមន្ត្រីពន្ធនាគារ ប្រព្រឹត្តកាលពីថ្ងៃទី២៦ ខែកុម្ភៈ ឆ្នាំ២០១៦។
ជនជាប់ចោទឈ្មោះ គុយ សិទ្ធិសក្កិ មិនមានវត្តមានក្នុងសវនាការនេះទេ ដោយមានមេធាវីការពារសិទ្ធិ បានអានចម្លើយរបស់ជនជាប់ចោទនៅដំណាក់ការចៅក្រមស៊ើបសួរ។ ជនជាប់ចោទឆ្លើយថា ខ្លួនបានស្គាល់ សុខ ចិន្តា ហៅ វ៉ាន់ លីឡា តាមហ្វេសប៊ុកកាលពីឆ្នាំ២០១៤ ហើយដល់ឆ្នាំ២០១៥ ក៏បានស្រលាញ់គ្នា ហើយក៏បាននាំទៅលេងផ្ទះនិងជួបប៉ាម៉ាក់។ចំណែករឿងដែលចោទថា ខ្ញុំបង្ហោះរូបអាសអាភាស ខ្លួនមិនបានដឹងទេ និងសុំឲ្យតុលាការជួយរកយុត្តិធម៌ឲ្យខ្ញុំផង។
ចំណែកចម្លើយដើមបណ្តឹង សុខ ចិន្តា ហៅ វ៉ាន់ លីឡា ជាតារាចម្រៀងដ៏ល្បី នៅផលិតកម្ម Pleng Record បានស្នើសុំឲ្យតុលាការផ្តន្ទាជនជាប់ចោទទៅតាមផ្លូវច្បាប់ ហើយដើមបណ្តឹង ក៏អវត្តមានក្នុងពេលសវនាការដែរ។
មេធាវីការពារសិទ្ធិឲ្យដើមបណ្តឹងលោក នួន បូរ៉ា បាននិយាយនៅពេលសវនាការថា កាលពីថ្ងៃទី២៦ ខែកុម្ភៈ ឆ្នាំ២០១៦ លោក គុយ សិទ្ធិសក្កិ និង ដើមបណ្តឹង សុខ ចិន្តា ហៅ វ៉ាន់ លីឡា បានឈ្លោះគ្នាហើយ គុយ សិទ្ធិសក្កិ ក៏វាយដើមបណ្តឹង សុខ ចិន្តា ពេលនោះជនរងគ្រោះ ក៏បានបើកទ្វារឡានចេញរត់ឲ្យគេជួយ ហើយពេលនោះ គុយ សិទ្ធិសក្កិ ក៏បានបើកឡានរបស់ជនរងគ្រោះចេញទៅ ហើយនៅក្នុងឡាននោះ ក៏មានកាបូប ទូរស័ព្ទរបស់ជនរងគ្រោះផងដែរ ដោយរយ:ពេលជិត១០ថ្ងៃ បានយកមកប្រគល់ឲ្យវិញ។ហើយចំណែករូបដែលបានបង្ហោះនោះគឺដោយសារតែការស្រលាញ់គ្នា និង គិតថានឹងបានគ្នាជាប្តីប្រពន្ធ ទើបមានការថតផ្ញើឲ្យគ្នាមើលដោយសារតែ គុយ សិទ្ធិសក្កិ នៅរៀនឯបរទេស។ លោកមេធាវីក៏បានបញ្ជាក់ផងដែរថា ដើមបណ្តឹង សុខ ចិន្តា បានទាមទារជំងឺចិត្តចំនួន ៥០ម៉ឺនដុល្លារ។
តំណាងអយ្យការអមសាលាដំបូងរាជធានីភ្នំពេញលោក សេង ហៀង ធ្វើសេចក្តីសន្និដ្ឋានតាមការអានចម្លើយរបស់ជនជាប់ចោទនិងជនរងគ្រោះពិតជាមានអំពើហិង្សាដោយចេតនានិងចែកចាយរូបអាសអាភាសពិតមែន តំណាងអយ្យការនៅតែតម្កល់បទចោទនៅដដែល។
សូមជម្រាបថា ទោះជាយ៉ាងណាសំណុំរឿងក្តីខាងលើនេះត្រូវបានលោកចៅក្រម កោ វណ្ឌី អនុប្រធានសាលាដំបូងរាជធានីភ្នំពេញ បានសម្រេចកំណត់លើកពេលទៅប្រកាសសាលក្រមនៅរសៀលថ្ងៃទី១៥ ខែសីហា ឆ្នាំ២០១៧ ខាងមុខនេះ៕
