មួយសប្ដាហ៍ក្រោយពេល ចិន និង រុស្ស៊ី ចុះកិច្ចព្រមព្រៀងពាណិជ្ជកម្មតម្លៃ ១០ពាន់លានដុល្លារអាមេរិក ថ្មីៗនេះរដ្ឋាភិបាលទីក្រុងមូស្គូទើបបានជួបសហការជាមួយប្រទេសឥណ្ឌា ដោយភាគីទាំងពីរគ្រោងនឹងចុះហត្ថលេខាលើកិច្ចសន្យា ទិញ-លក់ ប្រព័ន្ធការពារមីស៊ីលដែនអាកាស ប្រភេទ S-400 ដែលមានតម្លៃរាប់ពាន់លានដុល្លារ។
ដកស្រង់សំដីដោយសារព័ត៌មាន Sputnik លោកអគ្គនាយកក្រុមហ៊ុននាំចេញសព្វាវុធប្រទេសរុស្ស៊ី Alexander Mikheev និយាយថា "រុស្ស៊ី គ្រោងនឹងចុះហត្ថលេខាលើកិច្ចព្រមព្រៀងលក់ប្រព័ន្ធការពារមីស៊ីលដែនអាកាសប្រភេទ S-400 ទៅឲ្យឥណ្ឌា ដែលមានតម្លៃទឹកប្រាក់រហូតដល់ ៥.៥ពាន់លានដុល្លារអាមេរិក”។
លោកអគ្គនាយកក្រុមហ៊ុនខាងលើបានបញ្ជាក់ទៀតថា រុស្ស៊ីនឹងព្យាយាមធ្វើយ៉ាងណាឲ្យការចុះកិច្ចព្រមព្រៀងនេះត្រូវបញ្ចប់នៅក្នុងឆ្នាំ២០១៧។
