កូរ៉េខាងត្បូងថា រដ្ឋាភិបាលកូរ៉េខាងជើងនឹងប្រើរថយន្តដឹងមីស៊ីលខ្នាតធំរបស់ចិន ដែលទើបទិញមកពីទីក្រុងប៉េកាំង ដើម្បីធ្វើតេស្តមីស៊ីលអន្តរទ្វីប (ICBM) បន្ទាប់ពីសាកល្បងមីស៊ីលផ្លោងដោយជោគជ័យកាលពីម្សិលមិញ។ នេះបើយោងតាមការចុះផ្សាយរបស់សារព័ត៌មាន Channel News Asia នៅព្រឹកថ្ងៃទី០៥ ខែកក្កដា ឆ្នាំ២០១៧។
ជុំវិញបញ្ហានេះ ប្រធានាធិបតីអាមេរិកនិយាយថា ចិនមានកំហុសធ្ងន់ណាស់! ដែលបានខិតខំជួយទំនុកបម្រុងដល់កូរ៉េខាងជើង ដើម្បីអភិវឌ្ឍន៍កម្មវិធីនុយក្លេអ៊ែរ ដែលល្មើសនឹងច្បាប់អន្តរជាតិ។ លើសពីនេះទៀត រដ្ឋមន្ត្រីការបទេសលោក Rex Tillerson បានថ្កោលទោសយ៉ាងពេញទំហឹងទៅលើមីស៊ីលអន្តរទ្វីបរបស់ទីក្រុងព្យុងយ៉ាង ដែលកំពុងដំឡើងនៅតំបន់ធ្វើតេស្តអាវុធ ប្រុងនឹងបាញ់គំរាមទីក្រុងវ៉ាស៊ីនតោន។
លោកសង្កត់ធ្ងន់ថា "សកម្មភាពសកល គឺត្រូវតែបញ្ឈប់សកម្មភាពគំរាមកំហែង ហើយប្រទេសណាដែលគាំទ្រលោក គីម ជុងអ៊ុន តាមរយៈយោធា ឬ សេដ្ឋកិច្ចនោះ នឹងត្រូវចាត់ទុកជារបបគ្រោះថ្នាក់ និងទទួលការថ្កោលទោសយ៉ាងសក្ដិសមពីសំណាក់ក្រុមប្រឹក្សាសន្តិសុខអង្គការសហប្រជាជាតិ"។
