រាជធានីភ្នំពេញ៖ បន្ទាប់ពីមានព័ត៌មានចុះផ្សាយថា "ឧកញ៉ា ម៉ុង ឫទ្ធី បានរិះគន់លើរដ្ឋមន្ត្រីក្រសួងកសិកម្មថាចេះតែដើរសន្យារឿងទប់ស្កាត់ជ្រូក..."ដែលបានចុះផ្សាយ កាលពីថ្ងៃម្សិលមិញនោះ ឯកឧត្តម ម៉ុង ឫទ្ធី នៅរសៀលថ្ងៃទី៤ កក្កដា ពោលគឺនាមុននេះបន្តិច បានប្រកាសទាត់ចោលនូវព័ត៌មានខាងលើ ហើយថា មិនដឹងអ្នកសារព័ត៌មានបានសំដីលោកពីណាមកទេ ខណៈលោកមិនដែលបានសម្ភាសន៍ផងនោះ។
យោងតាមហ្វេសប៊ុកផ្លូវការរបស់ឯកឧត្ដមបណ្ឌិត ម៉ុង ឫទ្ធី បានសរសេរយ៉ាងដូច្នេះ ថា "ខ្ញុំមិនដឹងថា អ្នកសារព័ត៌មានបានសំដីខ្ញុំពីណាមកទេថា ខ្ញុំរិះគន់លើឯកឧត្ដមរដ្ឋមន្ត្រីក្រសួងកសិកម្ម បើខ្ញុំមិនដែលបានសម្ភាសន៍ផងនោះ។
រឿងនេះអាចកើតឡើងដោយសារតែ កសិករអ្នកចិញ្ចឹមជ្រូកចេះតែត្អូញត្អែរប្រាប់មកខ្ញុំថា បើនៅតែអនុញ្ញាតឱ្យនាំចូលជ្រូកខុសច្បាប់កាន់តែច្រើនឡើងៗអីចឹងពួកគាត់ប្រាកដជាស្លាប់អស់ហើយ ខ្ញុំបានតបទៅវិញថាចេះតែនិយាយថាជ្រូកនាំចូលខុសច្បាប់បើក្រសួងកសិកម្មចេញច្បាប់អនុញ្ញាតអោយវាមានអីខុសច្បាប់ទៀត។
គាត់បន្តទៀតថា ហើយចេះតែសន្យាចាំពិនិត្យសិក្សាសិន ខ្ញុំឆ្លើយថាបើថែមពាក្យមួយឃ្លាទៀតថា រហូតដល់ដួលរលំអស់សិន។ រឿងនេះអត់មានពាក់ព័ន្ធអីទៅនឹងឯកឧត្ដមរដ្ឋមន្ត្រីចុះទៅប៉ៃលិនទេ ហើយក៏មិនមានហេតុផលណាមួយដែលរះគន់គាត់នោះទេ។" ៕
