យោងតាមស្ថានភាពការស្ថាបនាកំណាត់ផ្លូវជាតិលេខ១ ដែលត្រូវឈានដល់ការបញ្ចប់គម្រោងនាពេលដ៏ខ្លីខាងមុខនេះ និងដោយមានការដាក់ចេញផែនការរបស់រដ្ឋបាលរាជធានីភ្នំពេញ ព្រមទាំងដើម្បីឆ្លើយតបនូវរាល់មតិយោបល់ និងសំណូមពរដ៏ច្រើនលើសលប់របស់ប្រជាពលរដ្ឋនៅក្នុងបណ្ដាញសង្គម Facebook ពាក់ព័ន្ធកិច្ចការរៀបចំសណ្ដាប់ធ្នាប់តាមដងផ្លូវសំខាន់ៗ។
រដ្ឋបាលខណ្ឌសូមប្រកាសបើកយុទ្ធនាការទ្រង់ទ្រាយធំ ដើម្បីចុះរៀបចំសណ្ដាប់ធ្នាប់កំណាត់ផ្លូវជាតិលេខ១ ឲ្យមានលក្ខណៈល្អប្រសើរ និងសោភ័ណភាពឡើងវិញ ស្របតាមយុទ្ធសាស្ត្ររបស់រាជរដ្ឋាភិបាល " ទីក្រុងស្អាត បរិស្ថានល្អ" ។ ដូច្នេះរដ្ឋបាលខណ្ឌសូមដាក់ចេញនូវទិសដៅ និងគោលបំណងដូចខាងក្រោម :
1- លុប បំបាត់ ឲ្យខានតែបាននូវរូបភាពរត់ចាប់ម៉ូយ និងលុបបំបាត់ចំណតរថយន្តឈ្នួលអានាធិបតេយ្យលើផ្លូវជាតិលេខ១ ។
2- រៀបចំចំណតបេនឡាន និងសម្របសម្រួលម្ចាស់រថយន្តឈ្នួលឲ្យចូលចំណតបេនបានត្រឹមត្រូវ។
3- ផ្សព្វផ្សាយព័ត៌មានដល់ប្រជាពលរដ្ឋដែលមានបំណងធ្វើដំណើរទៅខេត្តឆ្លងកាត់តាមផ្លូវជាតិលេខ១ ត្រូវមករកចំណតបេនឡានដែលអាជ្ញាធរនឹងខិតខំរៀបចំទីតាំងច្បាស់លាស់មួយនៅពេលខាងមុខ។
4- ផ្សព្វផ្សាយប្រជាពលរដ្ឋទូទៅ ដែលរស់នៅអមសងខាងផ្លូវជាតិលេខ១ ចូលរួមថែរក្សាការពារចិញ្ចើមផ្លូវសាធារណៈ និងដីចំណីផ្លូវសាធារណៈដែលរដ្ឋបានទូទាត់សំណងផលប៉ះពាល់រួចរាល់។
5- មានវិធានការចំពោះម្ចាស់ផ្ទះរូបណា ដែលបានសាងសង់រំលោភចិញ្ចើមផ្លូវសាធារណៈ និងយកដីចំណីផ្លូវសាធារណៈរបស់រដ្ឋធ្វើជាកម្មសិទ្ធិផ្ទាល់ខ្លួន។
6- ចាត់វិធានការតឹងរ៉ឹងចំពោះឡានប្រភេទធំដឹកទំនិញគ្រប់ប្រភេទដែលចេញចូលខុសម៉ោងពេល និងចាប់ផាកពិន័យរថយន្តដឹកដី គ្រួស ថ្ម និងខ្សាច់ ដែលធ្វើឲ្យប្រឡាក់ផ្លូវជាតិលេខ១។
7-បំផុសចលនាប្រជាជនតាមផ្លូវជាតិ ដើម្បីម្ចាស់ការចូលរួមបោសសំអាតអនាម័យលើចិញ្ចើមផ្លូវសាធារណៈខាងមុខផ្ទះរៀងៗខ្លួន និងគ្រប់គ្រងវេចខ្ចប់ទុកសំរាមអោយបានត្រឹមត្រូវ។
8- សហការជាមួយក្រុមហ៊ុនស៊ីនទ្រី ដើម្បីចុះសម្អាត និងលាងកំណាត់ផ្លូវជាតិលេខ១ ឲ្យបានស្អាតជាប់ជាប្រចាំ។
*** គោលបំណងទាំង 08 ចំណុចខាងលើនេះ រដ្ឋបាលខណ្ឌច្បារអំពៅ បានដាក់ចេញក្រោយពេលដែលរដ្ឋបាលខណ្ឌ បានប្រកាសផ្សព្វផ្សាយជូនដំណឹងដល់ប្រជាពលរដ្ឋទូទៅទាំងអស់ ជាពិសេសប្រជាពលរដ្ឋដែលរស់នៅក្នុងមូលដ្ឋានខណ្ឌច្បារអំពៅ ដើម្បីចូលរួមផ្ដល់មតិយោបល់តាំងពីថ្ងៃទី ០៨ ខែកក្កដា ឆ្នាំ២០១៧ មក។
បន្ទាប់ពីការប្រកាសជូនដំណឹងផ្សព្វផ្សាយ និងទទួលមតិយោបល់របស់ប្រជាពលរដ្ឋរួចមក រដ្ឋបាលខណ្ឌបានចាប់ធ្វើកិច្ចការជំហានដំបូងជាមួយម្ចាស់រថយន្តឈ្នួល និងអ្នករត់ចាប់ម៉ូយ ដោយបានកោះអញ្ជើញបងប្អូន ចំនួន 02 លើក មកប្រជុំជជែកពិភាក្សាដោះស្រាយសម្របសម្រួលរៀបចំឲ្យចូលចំណតបេនឡានឲ្យបានត្រឹមត្រូវ ប៉ុន្តែតាមរយៈការកោះអញ្ជើញទាំងពីរលើកនេះ ម្ចាស់រថយន្តឈ្នួលទាំងអស់មិនបានខ្វាយខ្វល់ពីលិខិតអញ្ជើញរបស់អាជ្ញាធរខណ្ឌឡើយ។
ដូច្នេះចាប់ពីថ្ងៃបើកយុទ្ធនាការនេះតទៅ រដ្ឋបាលខណ្ឌច្បារអំពៅ សូមប្រកាសជាជំហានដំបូងនេះ រដ្ឋបាលខណ្ឌនឹងចាត់វិធានការតឹងរ៉ឹងចំពោះម្ចាស់រថយន្តឈ្នួល និងអ្នករត់ចាប់ម៉ូយលើផ្លូវជាតិ មុនគេ ដោយមិនទទួលខុសត្រូវចំពោះការខាតបង់ផលប្រយោជន៍របស់បងប្អូនឡើយ។ ដោយឡែកផែនការផ្សេងៗទៀត រដ្ឋបាលខណ្ឌនឹងអនុវត្តតាមជំហានជាបន្តបន្ទាប់។
ប្រភព៖ សាលាខណ្ឌច្បាអំពៅ
