ក្រសួងការពារជាតិតៃវ៉ាន់ បាននិយាយឲ្យដឹងថា ខ្លួនត្រៀមរួចជាស្រេចក្នុងការការពារដែនកោះ ពីការឈ្លានពានសំណាក់ប្រទេសជិតខាង ខណៈដែលមានការផ្លាស់ប្ដូរថ្មីនៃការបង្កហេតុ និងការសម្ដែងកម្លាំងយោធាជើងទឹកនាពេលថ្មីៗនេះ។ បើយោងតាមគេហទំព័រសារព័ត៌មាន sputniknews បានចុះផ្សាយនារសៀលថ្ងៃពុធ ទី២៦ ខែកក្កដា ឆ្នាំ២០១៧។
អ្នកនាំពាក្យយោធាតៃវ៉ាន់លោក Chen Chung-chi បានថ្លែងក្នុងសន្និសីទសារព័ត៌មាន បន្ទាប់ពីកងកម្លាំងជើងទឹកចិន និងមហាអំណាចរុស្ស៊ី បានធ្វើឲ្យដែនសមុទ្រតៃវ៉ាន់ និងជប៉ុនរឹតតែរំជើបរំជួល តាមរយៈការសមយុទ្ធរួមគ្នា នៅសមុទ្រអន្តរជាតិនៅក្នុងសប្ដាហ៍នេះ។ ជុំវិញបញ្ហាខាងលើ លោកប្រធានាធិបតីតៃវ៉ាន់លោក Tsai Ing-wen ធ្លាប់បានបដិសេធក្នុងការរួបរួមជាមួយទីក្រុងប៉េកាំង ដោយអះអាងថា កោះតៃវ៉ាន់ និងចិនដីគោក គឺជាប្រទេសតែមួយ។
គួរបញ្ជាក់ផងដែរថា ប្រទេសចិន ក៏កំពុងបង្កើនការគំរាមកំហែងកាន់តែខ្លាំងឡើងជាមួយប្រទេសជិតខាង នៅក្នុងរយៈពេលប៉ុន្មានខែថ្មីៗនេះ ដោយដាក់ទណ្ឌកម្មទៅលើកូរ៉េខាងត្បូង ទាក់ទងនឹងការដំឡើងប្រព័ន្ធការពារមីស៊ីល THAAD និងជម្លោះតាមបណ្ដោយព្រំដែនជាមួយឥណ្ឌា៕
