ថ្មីៗនេះតារាកំប្លែងស្រីកញ្ញា វ៉ាន់ នីឡា បានសរសេរសារភ្ជាប់ជាមួយរូបភាពមួយសន្លឹកថា "គ្រប់យ៉ាងគឺចប់ សុំទោសដែលមិនអាចកាន់ដៃអ្នកបន្តទៅមុខទៀត អរគុណគ្រប់យ៉ាង ដែលបានផ្ដល់ឲ្យសំណាងល្អណា Reng Sey"។ ភ្លាមៗនោះគូស្នេហ៍កញ្ញា ក៏បានឆ្លើយតបវិញថា "ធ្វើម៉េចបើនិស្ស័យពួកយើងបានត្រឹមគូដណ្ដឹង"។ ដំណឹងនេះធ្វើឲ្យមានការភ្ញាក់ផ្អើលខ្លាំង និងមានមជ្ឈដ្ឋានជាច្រើនចង់ដឹងពីមូលហេតុ ពេលនេះលោកតា វិទ័រ ឪពុកបង្កើត វាន់ នីឡា បានចេញមុខបញ្ជាក់ជាមួយ Kqube នឹងបានស្រាយអស់ចម្ងល់ដែលកំពុងចាក់ដោតអារម្មណ៍អ្នកគាំទ្រ។
លោកតា វិទ័រ បានប្រាប់ថា " បាទ ពេលនេះកូនៗខ្ញុំមិនមានរឿងអីទៀតទេ គឺពួកគាត់គ្រាន់តែឈ្លោះគ្នាបន្តិចបន្តួច បែបក្មេងៗ តែពេលនេះប្រែមកធម្មតាវិញហើយ មុននេះបន្តិចពួកគេក៏ទើបបណ្ដើរគ្នាទៅញ៉ាំអាហារដូចសព្វដង។ ហើយបើទោះជាពួកគេមានបញ្ហាជាមួយគ្នាម៉េចក៏ដោយ គឺឪពុកម្ដាយទាំងសងខាង មិនគាំទ្រឲ្យគេបែបបាក់គ្នាឡើយ តែធ្វើម៉េចក្មេងៗវារមែងឈ្លោះគ្នា ដូចចានក្នុងរាវតែងប៉ះទង្គិចគ្នាជារឿងធម្មតាទៅហើយ"។
បន្ថែមពីការបញ្ជាក់ប្រាប់នេះដែរលោក សុវណ្ណ រិទ្ធី ហៅតាវិទ័រ ក៏បានបញ្ជាក់បន្ថែមថា ពេលនេះឪពុកម្ដាយទាំងសងខាង ក៏បានគិតគួររឿងរៀបការពួកគេទាំងពីរហើយដែរ គឺបានរកគ្រូអាចារ្យគន់គូររកថ្ងៃពាលាល្អហើយដែរ តែគ្រូបានប្រាប់ថា ពេលវេលាល្អគឺបាននៅចុងឆ្នាំ២០១៨ ដូច្នេះហើយពេលវេលានៅរាងយូរលោកមិនទាន់បានកំណត់យកថ្ងៃខែនៅឡើយ តែលោកគឺចង់ញ៉ាំក្បាលជ្រូកកូនស្រីរៀបការក្នុងពេលឆាប់ៗណាស់៕
