រាជធានីភ្នំពេញ៖ បន្ទាប់ពីមានរថយន្ត Lexus RX 300 មួយគ្រឿងបានបើកបុករថយន្ត Camary បាឡែនពណ៌ទឹកមាស ពាក់ស្លាក់ ភ្នំពេញ 2AQ- 8675 របស់ DJ Show Y កាលពីម៉ោងជិត១ អាធ្រាត្រឈានចូលថ្ងៃទី១៦ កក្កដា ម្សិលមិញ ហើយគេចខ្លួនបាត់ស្រមោលនោះ កាលព្រឹកមិញនេះ DJ Show Y បានដាក់ពាក្យបណ្ដឹងរួចហើយ ដើម្បីស្វែងរកម្ចាស់រថយន្តខាងលើចូលខ្លួនដោះស្រាយ។
DJ Show Y ម្ចាស់ពានរង្វាន់ឌីជេកម្ពុជា ២០១៦ បានប្រាប់ KQUBE ថា កញ្ញាបានមកដាក់ពាក្យបណ្ដឹងរួចហើយ នៅអគ្គស្នងការនគរបាលជាតិ កាលព្រឹកថ្ងៃទី១៧ ខែកក្កដា ឆ្នាំ២០១៧នេះ ដើម្បីស្វែងរកអត្តសញ្ញាណម្ចាស់រថយន្ត Lexus ខាងលើ ឲ្យចូលខ្លួនដោះស្រាយ ព្រោះថារថយន្តរបស់នាងបានខូចខាតមួយកំណាត់ក្រោយស្ទើរទាំងស្រុង។
កញ្ញាបានបញ្ជាក់ករណីគ្រោះថ្នាក់ចរាចរណ៍នេះថា ដំបូងឡើយនៅយប់ថ្ងៃទី ១៥ ខែកក្កដា រូបនាងចេញពិធីកម្មមួយនៅក្បែរកំពង់ផែទឹកសាបភ្នំពេញ រួចក៏ទៅភោជនីយដ្ឋាន Riverhouse (ជួរមាត់ទន្លេ) ដើម្បីពិភាក្សាការងារជាមួយអតិថិជន ហើយក៏បានថតឡានបណ្តោយផ្លូវ នៅស្តាំជួរមាត់ទន្លេបែបមុខទៅផ្សាររាត្រី ដោយមានដាក់ផ្លាកសញ្ញាចតផងដែរ (អក្សរP)។
លុះមកដល់ម៉ោងប្រមាណ ១២: ៤០នាទីយប់ឈានចូល ថ្ងៃទី១៦កក្កដា ស្រាប់តែមានរថយន្ត Lexus RX 300 ស្លាកលេខ ភ្នំពេញ 2M- 1084 មួយគ្រឿងទំនងជាអ្នកបើកបរស្រវឹង បានបើកយ៉ាងលឿនក្នុងទិសដៅពីត្បូងទៅជើង (មុខវាំងទៅក្រោមស្ពានជ្រោយចង្វារ) ក៏បុកឡានរបស់នាងស្ទើរមួយពេញទំហឹង បណ្តាលឲ្យរុញឡានរបស់នាងទៅមុខប្រមាណ១០ម៉ែត្រ ហើយបន្តបុករថយន្ត Prado មួយគ្រឿង រួចក៏ព្យាយាមបើកគេច។
ឃើញបែបនេះ សន្តិសុខ Riverhouse ម្នាក់ក៏បានជិះម៉ូតូតាម រហូតដល់រង្វង់មូលកួចកាណុងត្រង់ចំណុចស្ថានីយប្រេង តេលា ម្ចាស់រថយន្តនោះក៏បង្អង់ឡានហើយបើកកញ្ចក់ហាក់បញ្ចេញសកម្មភាពគំរាមមកលើសន្តិសុខរូបនោះ។ ដោយស្ថានការណ៍មិនស្រួល សន្តិសុខខាងលើ ក៏បានឈប់តាមរថយន្តបង្ក ហើយត្រឡប់មកវិញបានត្រឹមបង្ហាញរូបថតស្លាក់លេខនិងរៀបរាប់ប្រាប់នាងតាមដំណើររឿងខាងលើប៉ុណ្ណោះ។
យ៉ាងណាមិញ នេះជាព័ត៌មានដែលក្រុមការងារ KQUBE ទទួលបានពី DJ Show Y ម្ខាងប៉ុណ្ណោះទេ ប្រសិនជាម្ចាស់រថយន្ត Lexus ចង់បកស្រាយបំភ្លឺ KQUBE ស្វាគមន៍ជានិច្ច។
