ខេត្តកែប៖ នៅវេលាម៉ោង៤៉ទៀបភ្លឺ ថ្ងៃទី១៥ សីហា ឆ្នាំ ២០១៧ មានករណីបំផ្ទុះទូ ATM របស់ធនាគារ ABA ដែលដាក់នៅមុខអាហារដ្ឋានដេលី តាមផ្លូវជាតិលេខ33A ស្ថិតនៅភូមិថ្មីសង្កាត់ព្រៃធំ ក្រុងកែប ខេត្តកែប បង្កឡេីងជនសង្ស័យមិនស្គាល់អត្តសញ្ញាណបានធ្វេីសកម្មភាព ដោយយកបំពង់ផ្សារដែកយកមកកាត់ដេីម្បីយកប្រាក់ក្នុងទូ តែមិនបានសម្រេច បណ្តាលឲ្យឆ្លងចរន្តអគ្គិសនីផ្ទុះឆេះអស់ទាំងស្រុង។
វត្ថុតាងបន្សល់ទុក មានបំពង់ផ្សារ និងទុយោប្រហែលបីម៉ែត្រ កូនសោរលេខដប់ចំនួនមួយ កំប៉ុងបាញ់ថ្នាំខ្មៅមួយកំប៉ុង។
លោកឧត្ដមសេនីយ៍ទោ អ៊ីង សំអុល ស្នងការនគរបាលខេត្តកែប បានឲ្យដឹងថា ករណីនេះជាអំពើចោរកម្ម លួចយកលុយ ប៉ុន្តែទាក់នឹងចំនួនទឹកប្រាក់ត្រូវជនល្មើសលួចយកទៅនោះ លោកមិនទាន់អាចកំណត់ទេ ដោយគ្រាន់តែសន្និដ្ឋានជាបឋមថា មិនបានយកលុយទៅទាំងអស់ទេ ដោយសារលុយមួយចំនួនត្រូវឆេះនឹងកន្លែង។
ក្រោយកើតហេតុសមត្ថកិច្ច បានធ្វើការស្រាវជ្រាវដើម្បីរកមុខជនសង្ស័យយកទៅដោះស្រាយតាមនីតិវិធីច្បាប់៕
សូមទស្សនាវីដេអូដែលជនល្មើស យកស្រ្ពាយទៅបាញ់បំបិតមុខកាមេរ៉ាសុវត្ថិភាពនៅក្នុងទូ ATM របស់ធនាគារ ABA មុនដាក់គ្រឿងបំផ្ទុះ, លុយជាង១ម៉ឺនដុល្លារ ត្រូវខូចខាត និងបាត់បង់ (Video FreshNews)
សូមបញ្ជក់ថា ករណីបំផុតទូATMនេះជាករណីមានជាលើកទីមួយនៅក្នុងក្រុងកែប និងក៏ជាករណីថ្មីមួយទៀត បន្ទាប់កើតឡើងនៅក្នុងរាជធានីភ្នំពេញ ដោយមានជនល្មើសបានបំផ្ទុះយកលុយក្នុងទូATM ធនាគារកាណាឌីយ៉ា នៅជាប់របងមន្ទីរពេទ្យកុមារជាតិ ក្នុងសង្កាត់ទឹកល្អក់១ ខណ្ឌទួលគោកកាលយប់អធ្រាត្រឈានចូលថ្ងៃទី១៨ មីនា ឆ្នាំ២០១៧កន្លងទៅ៕
