រាជធានីភ្នំពេញ៖ ក្រោយស្ថានការណ៍ធូរស្បើយលើបញ្ហាវិវាទព្រំដែនជាមួយឡាវ នៅតំបន់ អូរអាឡៃ និង អូរតាង៉ាវ ក្នុងស្រុកសៀមប៉ាង ខេត្តស្ទឹងត្រែង នៅព្រឹកនេះ លោកនាយករដ្ឋមន្ត្រីកម្ពុជា ហ៊ុន សែន បានបង្ហោះរូបភាពដ៏ស្និទ្ធស្នាលជាមួយប្រមុខរាជរដ្ឋាភិបាលឡាវ បន្ទាប់ពីថ្នាក់នាំកំពូលទាំងពីរបានជួបពិភាក្សាគ្នារកដំណោះស្រាយដោយសន្តិវិធី នៅទីក្រុង វៀងចន្ទន៍។
រូបភាពអង្គុយរួមតុមូលជាមួយគ្នាប្រកបដោយភាពសប្បាយរីករាយនេះ ទំនងដូចជាការលើកឡើងរបស់នាយករដ្ឋមន្ត្រីកម្ពុជា កាលពីម្សិលមិញថា លោកបានបង្កើត WhatsApp មួយដល់នាយករដ្ឋមន្ត្រី ឡាវ ដើម្បីងាយស្រួលពិភាក្សាគ្នាជាបន្ទាន់ ជៀសវាងមានបញ្ហាការទទួលព័ត៌មានយឺតយ៉ាវ ដូចនឹងករណីលិខិតផ្លូវការនាយករដ្ឋមន្ត្រីកម្ពុជា ផ្ញើជូនលោក ថោងលន់ ជាច្រើនថ្ងៃ ប៉ុន្តែមិនទាន់ទទួលបាន ដែលបង្កឲ្យមានសភាពការណ៍តានតឹងដាក់គ្នាលើបញ្ហាព្រំដែន។
ការបង្កើត Whats App ឲ្យលោកនាយករដ្ឋមន្ត្រីឡាវ ថោងលន់ ស៊ីស៊ូលីត ក្នុងដំណើរជួបពិភាក្សានៅប្រទេសឡាវនេះ លោក ហ៊ុន សែន បានចងលេខ ៣ ខ្សែ ដោយដាក់ឈ្មោះថា "With Lao Prime Minister " ហើយការបង្កើតនេះក៏ជាបង្កើតប្រព័ន្ធទំនាក់ទំនងមួយទៀតដែលលោក ហ៊ុន សែន បានបង្កើត LINE ឲ្យលោក ថោងលន់ កាលពីលើកមុន៕
