សហរដ្ឋអាមេរិក នឹងផ្ដល់ឲ្យកូរ៉េខាងត្បូង នូវអំណាច ដើម្បីផលិតកាំជ្រួចមីស៊ីល កាន់តែច្រើន នៅពេលភាពតានតឹង បានកើនឡើងជាមួយលោក គីម ជុងអ៊ុន។ នេះបើយោងតាមសារព័ត៌មាន Express បានចុះផ្សាយនាព្រឹកថ្ងៃពុធ ទី០៩ ខែសីហា ឆ្នាំ២០១៧។
អ្នកនាំពាក្យមន្ទីរបញ្ចកោណអាមេរិក បាននិយាយប្រាប់ថា បច្ចុប្បន្នកូរ៉េខាងត្បូងទើបតែត្រូវបានអនុញ្ញាតឲ្យអភិវឌ្ឍមីស៊ីល ដែលមានទម្ងន់ ៥០០គីឡូក្រាម និងសមត្ថភាពបាញ់ចំគោលដៅរយៈចម្ងាយ ៨០០គីឡូម៉ែត្រ ស្ថិតនៅក្រោមគោលការណ៍ណែនាំ ដែលមិនអាចកែប្រែ តាំងពីឆ្នាំ ២០១២។
មុនពេលការគំរាមកំហែងចុងក្រោយបំផុតរបស់ទីក្រុងព្យុងយ៉ាង លោកប្រធានាធិបតី ដូណាល់ ត្រាំ បានព្រមានលោក គីម ជុងអ៊ុន ថា កូរ៉េខាងជើងនឹងត្រូវបានជួបជាមួយ ភ្លើងកំហឹង ប្រសិនបើនៅតែបន្តគំរាមកំហែងដល់សហរដ្ឋអាមេរិក និងសម្ព័ន្ធមិត្តរបស់ខ្លួន។
គួរបញ្ជាក់ផងដែរថា ទីក្រុងព្យុងយ៉ាង បានបាញ់សាកល្បងគ្រាប់នុយក្លេអ៊ែរជាច្រើនគ្រាប់ ទទួលបានជោគជ័យ វាបង្ហាញឲ្យឃើញថា កូរ៉េខាងជើង មិនខ្លាចការដាក់ទណ្ឌកម្មរបស់អង្គការសហប្រជាជាតិ នោះឡើយ៕
