ចក្រភពអង់គ្លេស ចំណាយលុយ ៧ពាន់លានដុល្លារ សម្រាប់កែប្រែនាវាចាស់ៗ ឲ្យទៅក្លាយជាសេរីថ្មី ដើម្បីការពារដែនទឹករបស់ខ្លួន និងសម្ព័ន្ធមិត្ត។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនាយប់ថ្ងៃព្រហស្បតិ៍ ទី១០ ខែសីហា ឆ្នាំ២០១៧។
មេបញ្ជាការកងទ័ពជើងទឹកអង់គ្លេសលោក Alex Burton បាននិយាយឲ្យដឹងថា នាវាពិឃាដ Type 42 ចំនួន ១២គ្រឿង កែឲ្យទៅជា Type 45s ចំនួន ៦គ្រឿង ដែលមានទំហំធំ និងមានអាវុធសេរីថ្មីច្រើនជាងមុន។ លោកមានទំនុកចិត្តថា កងនាវាចម្បាំង នាវាពិឃាដ និងនាវាល្បាតដែនសមុទ្ររបស់ចក្រភពអង់គ្លេស (OPVs) នឹងមានសមត្ថភាពខ្ពស់ និងការពារការវាយប្រហារបានរហ័សថែមទៀតផង។
ក្រសួងការពារជាតិ គ្រោងនឹងកាតបន្ថយនាវាចម្បាំង Type 26 ពី ១៣គ្រឿង មកនៅត្រឹម ៨គ្រឿង ព្រមទាំងបង្កើតនាវាចម្បាំងថ្មី Type 31 ចំនួន ៥គ្រឿងបន្ថែម។ ពីរសប្ដាហ៍មុនកងកម្លាំងជើងទឹកអង់គ្លេស បានធ្វើលំហាត់ប្រាណ Saxon Warrior ដោយប្រើគ្រាប់ពិត ជាមួយកងទ័ពនាវាអាមេរិក USS George HW Bush។
គួរបញ្ជាក់ផងដែរថា មេបញ្ជាការកងទ័ពជើងទឹកអង់គ្លេសលោក Andrew Betton និយាយថា សមយុទ្ធនេះ ដែលចូលរួមដោយនាវាចម្បាំង Type 23 អាចបង្ហាញថា ទីក្រុងឡុងដុង មានសមត្ថភាពខ្ពស់ក្នុងការការពារដែនទឹក និងសង្គ្រាមនុយក្លេអ៊ែរពីប្រទេសជិតខាង៕
