ខេត្តស្វាយរៀង៖ ទីបំផុតអំពើឃាតកម្មដ៏សាហាវរំលោភសម្លាប់ រួចប្លន់យកទ្រព្យសម្បត្តិមានខ្សែក និងជញ្ជៀន ពីនារីបុគ្គលិកបម្រើការងារនៅកាស៊ីណូ «Good Luck» នាក្រុងបាវិត ខេត្តស្វាយរៀង ដែលធ្វើឲ្យមានការចាប់អារម្មណ៍ និងថ្កោលទោសឃាតក តាមបណ្ដាញសង្គម Facebook តៗគ្នានោះ នៅពេលនេះកម្លាំងនគរបាលខេត្តស្វាយរៀង បានតាមចាប់ខ្លួនជនសង្ស័យជាឃាតកចំនួន២នាក់ បានហើយនៅភ្នំពេញ និងនៅស្វាយរៀងតែម្តង ដែលពួកគេមានមុខរបរជាអ្នកបើករថយន្ដតាក់ស៊ី ។ ប៉ុន្តែជាអ្នកផ្សេងមិនមែនជាអ្នករត់តាក់ស៊ីមានឈ្មោះសម្បត្តិ តាក់ស៊ីនោះទេ គឺគេបានផ្ទេររថយន្តឲ្យអ្នករត់តាក់ដូចគ្នា ដែលរស់នៅភូមិព្រៃតាញ៉យ ឃុំខ្សែត្រ ស្រុកកំពង់រោទ៍ ។
នៅរសៀលថ្ងៃទី០៨ ខែសីហា ឆ្នាំ២០១៧នេះ ស្នងការនគរបាលខេត្តស្វាយរៀង លោកឧត្តមសេនីយ៍ទោ កឹង ឃន បានបញ្ជាក់ថា ជនសង្ស័យ២នាក់ ម្នាក់ឈ្មោះ ឆើយ សុជាតិ អាយុ៣៦ឆ្នាំ និងម្នាក់ទៀតឈ្មោះ ផ្លៀក មុន្នី ត្រូវបានកម្លាំងរបស់លោក ធ្វើការស្រាវជ្រាវហើយឈានទៅដល់ការឃាត់ខ្លូន នៅស្វាយរៀង នាវេលាម៉ោង៨ព្រឹកមិញ។
លោកបន្តទៀតថា ឆ្លងតាមការសាកសួររហូតដល់ម៉ោង២រសៀលជនសង្ស័យក៏ឆ្លើយសារភាពថា កាលពីថ្ងៃទី២ សីហា ខ្លួននិងគូកនម្នាក់ទៀតឈ្មោះ ផ្លេក មុន្នី ភេទប្រុស អាយុ២៨ឆ្នាំ ជាអ្នករត់តាក់ស៊ី រស់ភូមិ-ឃុំជាមួយគ្នា ពិតជាបានរួមដៃគ្នាប្រព្រឹត្តិអំពើរំលោភទៅលើនារីរងគ្រោះអាយុ១៨ឆ្នាំនៅក្នុងរថយន្ត រួចរឹត.កសម្លាប់ ថែមទាំងយកទៅបោះចោលនៅចំណុចផ្លូវលំក្នុងភូមិតាពៅ សង្កាត់បាវិត ក្រុងបាវិតប្រាកដមែន ។ ហើយរហូតមកដល់វេលាម៉ោង៣និង២០នាទីថ្ងៃទី៨នេះ នគរបាលខេត្តស្វាយរៀង សហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ដឹកនាំដោយលោកវរសេនីយ៍ឯក ជាវ វិបុល ប្រធានការិយាល័យ។សមត្ថកិច្ចក៏ឃាត់ខ្លួនជនសង្ស័យឈ្មោះ ផ្លេក មុន្នី ម្នាក់ទៀតនៅរាជធានីភ្នំពេញ ។
លោកឧត្តមសេនីយ៍ស្នងការ បានបញ្ជាក់ទៀតថា ជនសង្ស័យទាំង២នាក់ មានមុខរបរជាអ្នកបើករថយន្ដតាក់ស៊ី រស់នៅភូមិព្រៃតាញ៉យ ឃុំខ្សែត្យ ស្រុកកំពង់រោ ខេត្តស្វាយរៀង។
បើតាមលោកឧត្តមសេនីយ៍ស្នងការ មុនពេលកើតហេតុនារីរងគ្រោះ បានជិះក្នុងរថយន្ដតាក់ស៊ី ម៉ាក Highlander ឆ្ពោះទៅខេត្តស្វាយរៀង ហើយពេលទៅដល់ជីភូ ជនសង្ស័យម្នាក់ទៀត ដែលជាអ្នកបើករថយន្ដតាក់ស៊ីផងដែរនោះ បានទុករថយន្ដរបស់ខ្លួនចោល ហើយឡើងរថយន្ដ Highlander រួមគ្នាធ្វើសកម្មភាពរំលោភសម្លាប់ រួចហើយប្លន់យកខ្សែកមួយខ្សែ និងជញ្ជៀនមួយវង់ គេចខ្លួនតែម្ដង។
បច្ចុប្បន្នជនសង្ស័យទាំង២នាក់ បាននិងកំពុងសួរនាំនៅស្នងការដ្ឋាននគរបាលខេត្តស្វាយរៀង ដើម្បីកសាងសំណុំរឿងបញ្ជូនទៅកាន់តុលាការចាត់វិធានការបន្ដទៀត តាមផ្លូវច្បាប់។
សូមបញ្ជាក់ថា នារីរងគ្រោះអាយុ១៨ឆ្នាំ ជាបុគ្គលិកក្រុមហ៊ុនកាស៊ីណូ «Good Luck» កាលពីថ្ងៃទី០៤ ខែសីហា ឆ្នាំ២០១៧ ត្រូវបានប្រជាពលរដ្ឋ និងសមត្ថកិច្ចប្រទះឃើញសាកសព ដែលត្រូវបានគេរំលោភសម្លាប់។
លោកឧត្តមសេនីយ៍ទោ កឹង ឃន បានឲ្យដឹងថា នារីរងគ្រោះដែលត្រូវរំលោភសម្លាប់នេះ ឈ្មោះ សុខ ម៉ាលីន អាយុ១៨ឆ្នាំ បុគ្គលិកកាស៊ីណូ Good Luck ក្នុងក្រុងបាវិត មានទីលំនៅនៅខេត្តព្រះវិហារ ហើយប្រទះឃើញសព នៅកណ្ដាលវាលស្រែង ក្នុងភូមិតាពៅ សង្កាត់បាទី ក្រុងបាវិត។
បើតាមលោកឧត្តមសេនីយ៍ស្នងការ នារីជនរងគ្រោះត្រូវបានក្រុមគ្រួសារមកប្ដឹងថា បានបាត់ខ្លួននៅថ្ងៃទី០២ ខែសីហា ឆ្នាំ២០១៧កន្លងទៅ ដោយមុនពេលកើតហេតុ ស្ដ្រីរងគ្រោះបានទៅលេងឪពុកម្ដាយនៅស្រុកកំណើតឯខេត្តព្រះវិហារ ហើយបានត្រឡប់មកវិញឈប់នៅបេនឡានផ្សារអូឡាំពិក រាជធានីភ្នំពេញ រួចឡើងឡានបន្ដមកក្រុងបាវិត ដែលជាទីកន្លែងធ្វើការ។
លោកស្នងការ បានបញ្ជាក់ថា បើតាមការសាកសួរពីក្រុមគ្រួសារនារីរងគ្រោះ នៅពេលនាងជិះរថយន្ដតាមផ្លូវគ្រួសារបានតេសួរថា ជិះឡានមកដល់ណាហើយ ពេលនោះនារីរងគ្រោះថា មកដល់ម្ដុំផ្សារជីភូ ក្រុងបាវិត ស្រាប់តែពេលនោះក៏បាត់ដំណឹងតែម្ដង។ ក្រោយបាត់ដំណឹងភ្លាមក្រុមគ្រួសារបានមកដាក់ពាក្យបណ្ដឹង ដើម្បីឲ្យនគរបាលជួយអន្ដរាគមន៍តាមរក។
ជាមួយគ្នានោះ លោកស្នងការ ស្ថានភាពគ្រួសាររបស់ស្ដ្រីរងគ្រោះមានសភាពក្រលំបាកខ្លាំងណាស់ សូម្បីតែលុយដឹកសាកសពទៅធ្វើបុណ្យនៅស្រុកកំណើត ខេត្តព្រះវិហារក៏គ្មានផង ប៉ុន្ដែលោកបានឲ្យឡានសង្គ្រោះបន្ទាន់របស់ស្នងការដ្ឋាននគរបាលខេត្ត ដឹកសពយកទៅស្រុកកំណើតផងដែរ។
