ខេត្តសៀមរាប៖ ក្រុមអ្នកបុរាណវិទ្យារបស់អាជ្ញាធរអប្សរាបាន បន្តប្រទះឃើញព្រះពុទ្ធបដិមាច្រើនបំណែកទៀត ក្នុងនោះមានព្រះពុទ្ធបដិមាមួយអង្គ ដែលគេស្គាល់ថា ជាព្រះពោធិ៍សត្វមានព្រះនាមហៅថា «ភៃសជ្យគុរុ» ដែលមានន័យថា ព្រះពុទ្ធគ្រូសេ្តចថ្នាំនៅសម័យបុរាណ។
ក្រុមអ្នកស្រាវជ្រាវ បានរៀបចំពិធីសាសនាមួយនៅព្រឹកថ្ងៃទី៨ ខែសីហា ឆ្នាំ២០១៧ មុនបន្តជីក និងលើកព្រះពុទ្ធរូបចេញពីកន្លែងកំណាយ។ បដិមាដែលខ្លះជាព្រះពុទ្ធប្រក់នាគ ត្រូវបានរកឃើញនៅរណ្តៅកំណាយទី៤នៅផ្នែកខាងកើតនៃប្រាសាទទន្លេស្ងួត ដែលជាមន្ទីរពេទ្យក្នុងរាជ្យព្រះបាទជ័យវរ្ម័នទី៧ផងដែរ។
លោក អ៊ឹមសុខរិទ្ធី អនុប្រធានមជ្ឈមណ្ឌលអន្តរជាតិ ស្រាវជ្រាវ និងតម្កល់ឯកសារអង្គរនៃអាជ្ញាធរជាតិអប្សរា បានឲ្យដឹងថា បំណែកព្រះពុទ្ធរូបទាំងនោះត្រូវបានជីកឃើញនៅល្ងាចថ្ងៃ៦ ខែសីហា ហើយតាមការពិនិត្យទម្រង់នៃបំណែករូបទាំងនោះ ថាជាបំណែករូបផ្សេងៗពីគ្នា។
បើតាមលោក អ៊ឹម សុខរិទ្ធី បញ្ជាក់ថា ក្នុងចំណោមព្រះពុទ្ធរូបទាំងនោះ គឺមានបដិមាមួយដែលគេដឹងថា ជាព្រះពុទ្ធស្តេចថ្នាំ ដោយពិនិត្យលើទម្រង់រូប ដែលនៅលើព្រះហស្ថ ឬដៃមានដុំមូលមួយ រាងដូច សាជី។ រូបទាំងនោះតែងតម្កល់នៅគ្រប់មន្ទីរពេទ្យនៅក្នុងរាជ្យ ព្រះបាទជ័យវរ្ម័នទី៧។
គួររម្លឹកដែរថា នេះជាបដិមាទី២ហើយ ដែលអ្នកបុរាណវិទ្យានៃគម្រោងសិក្សាស្រាវជ្រាវនៃមន្ទីរពេទ្យក្នុងរាជ្យព្រះបាទជ័យវរ្ម័នទី៧ បានប្រទះឃើញនៅក្នុងគម្រោងស្រាវជ្រាវនៅប្រាសាទទន្លេស្ងួត។ បដិមាដ៏ធំមួយអង្គមានកម្ពស់រហូតដល់ទៅ ១,៩០ម៉ែត្រ និងស្មាទទឹងរហូតដល់ទៅ ០,៥៨ម៉ែត្រ បានរកឃើញនៅរណ្តៅកំណាយនៅផ្នែកខាងកើតប្រាសាទ។ ក្នុងរណ្ដៅនេះដដែល ក៏បានប្រទះឃើញបំណែក២ផ្សេងទៀតដែរ។ តាមការបញ្ជាក់របស់អ្នកជំនាញ បំណែកទាំង២នោះមានបំណែកជាកំភួនជើង នៃរូបបដិមាដ៏ធំនោះ។ ប្រភពនិងរូបភាព៖ អាជ្ញាធរជាតិអប្សរា
