ទីក្រុងប៉េកាំង៖ អ្នកដឹកជញ្ជូនសាធារណៈប្រទេសចិន បាននិយាយឲ្យដឹងថា ចំនួនរថយន្តក្រុងអគ្គិសនី នៅក្នុងទីក្រុងនឹងអាចកើនឡើងពី ១ពាន់ ទៅ១ម៉ឺនគ្រឿង នាឆ្នាំ២០២០។ នេះបើយោងតាមគេហទំព័រសារព័ត៌មាន ស៊ិន ហ៊ួរ (xinhua) បានចេញផ្សាយនារសៀលថ្ងៃពុធ ទី០២ ខែកក្កដា ឆ្នាំ២០១៧។
អនុប្រធានគ្រប់គ្រងទូទៅលោក Zhong Qianghua បានប្រាប់ឲ្យដឹងថា សមាមាត្រនៃរថយន្តក្រុងដែលដំណើរការដោយអគ្គិសនី ក្នុងចំណោមឡានក្រុងសាធារណៈសរុបនឹងកើនឡើងពី ១០ ទៅ៦០ភាគរយ ក្នុងរយៈពេលបីឆ្នាំខាងមុខនេះ។ លោកបានបន្តទៀតថា ឡានក្រុងអគ្គិសនីនេះ អាចកាត់បន្ថយការបំភាយឧស្ម័នកាបូនឌីអុកស៊ីតចំនួន ៤៥តោនក្នុងមួយឆ្នាំ។
គួរបញ្ជាក់ផងដែរថា រថយន្តក្រុងខាងលើ អាចជួយដឹកជញ្ជូនអ្នកដំណើរបានច្រើននាក់ និងចំណាយពេលតិច ព្រមទាំងជួយកាត់បន្ថយការបំភាយឧស្ម័នកាបូនឌីអុកស៊ីតជាច្រើននៅក្នុងប្រទេសចិន៕
