ប្រធានាធិបតីកូរ៉េខាងត្បូង បានព្រមានដល់មេដឹកនាំកំពូលអាមេរិកលោក Donald Trump មិនឲ្យធ្វើសកម្មភាពយោធាប្រឆាំងរបបលោក គីម ជុងអ៊ុន ដោយគ្មានការអនុញ្ញាតពីទីក្រុងសេអ៊ូលទេ ខណៈដែលភាពតានតឹងបានកើនឡើងនៅក្នុងឧបទ្វីបកូរ៉េ។ នេះបើយោងតាមសារព័ត៌មាន Express បានចុះផ្សាយនារសៀលថ្ងៃពុធ ទី១៦ ខែសីហា ឆ្នាំ២០១៧។
ប្រធានាធិបតីកូរ៉េខាងត្បូងលោក Moon Jae-in បាននិយាយថា គ្មាននរណាម្នាក់គួរត្រូវបានអនុញ្ញាតឲ្យសម្រេចចិត្តលើសកម្មភាពយោធានៅលើឧបទ្វីបកូរ៉េ ដោយគ្មានកិច្ចព្រមព្រៀងពីកូរ៉េខាងត្បូងទេ និងប្រឆាំងការគំរាមកំហែងផ្នែកសន្តិសុខ ហើយសង្កត់ធ្ងន់លើតម្រូវការចាំបាច់សម្រាប់កិច្ចប្រឹងប្រែងការទូតទាំងឡាយ។
លោកបានពន្យារពេលសាងសង់ប្រព័ន្ធការពារមីស៊ីលអាម៉េរិក THAAD ដែលត្រូវបានជំទាស់ដោយប្រទេសចិន ប៉ុន្តែចាប់តាំងពីពេលនោះមកបានផ្លាស់ប្ដូរសេចក្ដីសម្រេច កាលពីខែមុន បន្ទាប់ពីកូរ៉េខាងជើង បានសាកល្បងមីស៊ីលផ្លោងជាលើកទីពីរ។
ជុំវិញការប្រមានខាងលើ ទីភ្នាក់ងារព័ត៌មានមជ្ឈិមកូរ៉េ បានរាយការណ៍ថា លោក គីម ជុងអ៊ុន បានពិភាក្សាអំពីផែនការបាញ់មីស៊ីលផ្លោងរយៈចម្ងាយមធ្យម ចំនួនបួនគ្រាប់ ដែលឆ្លងកាត់ប្រទេសជប៉ុន ចូលទៅក្នុងដែនទឹកក្បែរកោះ Guam សហរដ្ឋអាមេរិក ប៉ុន្តែបានផ្អាកគម្រោងទាំងនេះទៅហើយ៕
