សំបុត្រសំងាត់របស់ក្រុម តាលីបាន (Taliban ) ត្រូវបានបើកចំហឲ្យដឹងថា យើងចង់ឲ្យប្រធានាធិបតីអាមេរិកលោក ដូណាល់ ត្រាំ ដកកងទ័ពខ្លួនទាំងអស់ចេញពីប្រទេស អាហ្វហ្គានីស្ថាន។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃអង្គារ ទី១៥ ខែសីហា ឆ្នាំ២០១៧។
លិខិតនោះអះអាងថែមទៀតថា ក្រុមមន្ត្រីអាហ្វហ្គានីស្ថាន កំពុងមើលស្រាលស្ថានភាពធ្ងន់ធ្ងរ ចំពោះការបាត់បង់ជីវិតរបស់ជនស៊ីវិលជាច្រើនសែននាក់ និងការវាយប្រហារទ្រង់ទ្រាយធំផងដែរ។ ក្រុមសកម្មប្រយុទ្ធ បាននិយាយថា យើងធ្វើសង្គ្រាម ដើម្បីសន្តិភាពក្នុងប្រទេសទាំងមូល និងបញ្ចប់នូវវត្តមានសហរដ្ឋអាមេរិកនៅក្នុងប្រទេសអាហ្វហ្គានីស្ថាន។
ប្រជាជនអាហ្វហ្គានីស្ថាន មិនមានបំណងអាក្រក់ចំពោះជនជាតិអាមេរិក ឬប្រទេសណាមួយផ្សេងទៀតនៅជុំវិញពិភពលោកទេ ប៉ុន្តែប្រសិនបើនរណាម្នាក់បំពានលើភាពបរិសុទ្ធរបស់ពួកគេនោះ យើងមានភាពស្ទាត់ជំនាញក្នុងការវាយ និងផ្ដួលរំលំអ្នកដែលមានបំណងឈ្លានពាន។
ប្រធានាធិបតីអាមេរិកលោក ដូណាល់ ត្រាំ បានប្រាប់ឲ្យដឹងថា លោកកំពុងពិចារណាយុទ្ធសាស្ត្រថ្មីមួយ សម្រាប់ការដាក់ពង្រាយកងទ័ពរាប់ពាន់នាក់ទៅកាន់ប្រទេសនោះ ដែលកំពុងហែកហួរគ្នាដោយសង្គ្រាម ដែលជាផ្នែកមួយនៃសម្ព័ន្ធភាព ដឹកនាំដោយអង្គការសន្ធិសញ្ញាអាត្លង់ទិចខាងជើង ណាតូ (NATO)។
គួរបញ្ជាក់ផងដែរថា នៅចន្លោះឆ្នាំ២០០១ ដល់ឆ្នាំ ២០១៦ ទីក្រុង វ៉ាស៊ីនតោន បានចំណាយថវិកាចំនួន ៧៨០ពាន់លានដុល្លារនៅអាហ្វហ្គានីស្ថាន និងសម្លាប់ជនស៊ីវិលប្រហែល ១៧៣.០០០នាក់ ដោយយោងតាមគម្រោងអាទិភាពជាតិ (NPP) ហើយបានក្លាយជម្លោះដែលកំពុងអូសបន្លាយយូរបំផុតដោយគ្មានការបញ្ចប់ច្បាស់លាស់៕
