អាជ្ញាធរផ្លូវដែកអេហ្ស៊ីប បានឲ្យដឹងថា ហេតុការណ៍គ្រោះថ្នាក់មួយ បានកើតឡើងនៅពេលដែលរថភ្លើងមួយគ្រឿង ធ្វើដំណើរមកពីរដ្ឋធានីគែរ ឆ្ពោះទៅកាន់ទីក្រុង Alexandria បានទៅបុកកន្ទុយរបស់រថភ្លើងមួយគ្រឿងផ្សេងទៀត ដែលមានគោលដៅដូចគ្នា។ នេះបើយោងតាមសារព័ត៌មាន CNN បានចេញផ្សាយនាយប់ថ្ងៃសុក្រ ទី១១ ខែសីហា ឆ្នាំ ២០១៧។
វេជ្ជបណ្ឌិតលោក Khaled Mojahed មកពីក្រសួងសុខាភិបាលអេហ្ស៊ីប បានប្រាប់ឲ្យដឹងថា មនុស្សយ៉ាងតិច ៤០នាក់បាត់បង់ជីវិត និង១៣៣នាក់ផ្សេងទៀតទទួលរងរបួសយ៉ាងធ្ងន់ធ្ងរ បន្ទាប់ពីរថភ្លើងចំនួនពីរគ្រឿង បានបុកគ្នាយ៉ាងពេញទំហឹង នៅក្នុងទីក្រុង Alexandria តាមបណ្ដោយឆ្នេរភាគខាងជើងអេហ្ស៊ីប។
គួរបញ្ជាក់ផងដែរថា យ៉ាងណាមិញមូលហេតុដែលបណ្ដាលឲ្យមានសោកនាដកម្មនេះ កើតឡើងនោះ ពុំទាន់ដឹងច្បាស់នៅឡើយទេ ខណៈអាជ្ញាធរអេហ្ស៊ីប នៅតែកំពុងធ្វើការស៊ើបអង្កេតនៅឡើយ៕
