កូរ៉េខាងជើង បានគំរាមកំហែងនឹងបាញ់គ្រាប់មីស៊ីលឆ្លងទ្វីប ទៅលើកោះ Guam ប្រទេសអាមេរិក គ្រប់ពេលវេលា ក្រោយពេលលោក ដូណាល់ ត្រាំ បានព្រមានទីក្រុងព្យុងយ៉ាងនាពេលថ្មីៗនេះ។ បើយោងតាមគេហទំព័រសារព័ត៌មាន Express បានចេញផ្សាយនាព្រឹកថ្ងៃពុធ ទី០៩ ខែសីហា ឆ្នាំ២០១៧។
ប្រធានាធិបតីកូរ៉េខាងជើងលោក គីម ជុងអ៊ុន បាននិយាយថា ខ្លួនកំពុងពិនិត្យមើលដោយប្រុងប្រយ័ត្ននូវផែនការវាយប្រហារទឹកដីអាមេរិក ដោយប្រើគ្រាប់មីស៊ីលឆ្លងទ្វីបប្រភេទ Hwaseong-12 បន្ទាប់ពីលោក ដូណាល់ ត្រាំ បានចុះហត្ថលេខាទៅលើសេចក្ដីព្រាងច្បាប់ការដាក់ទណ្ឌកម្មទៅលើទីក្រុងព្យុងយ៉ាង និងគ្រោងធ្វើសមយុទ្ធបូកបីជាមួយសម្ព័ន្ធមិត្តរបស់ខ្លួនរួមមាន កូរ៉េខាងត្បូង និងជប៉ុន នៅលើកោះ Guam សហរដ្ឋអាមេរិក។
អ្នកនាំពាក្យកងកម្លាំងកូរ៉េខាងជើង បានប្រាប់ឲ្យដឹងថា "ថ្មីៗនេះ អាមេរិក បានបាញ់សាកល្បង គ្រាប់មីស៊ីលផ្លោងអន្តរទ្វីបប្រភេទ ICBM Minuteman-3 នៅមូលដ្ឋានទ័ពអាកាស Vandenburg រដ្ឋCalifornia ដែលផ្ដោតលើគោលដៅតែមួយ គឺទីក្រុងព្យុងយ៉ាង។
ជុំវិញបញ្ហានេះ ប្រធានាធិបតីអាមេរិកលោក ដូណាល់ ត្រាំ បានបញ្ជាក់ឲ្យដឹងថា "អ្វីដែលល្អបំផុតរបស់កូរ៉េខាងជើង គឺមិនធ្វើការគំរាមកំហែងដល់សហរដ្ឋអាមេរិក ដោយប្រើគ្រាប់នុយក្លេអ៊ែរនោះទេ ប្រសិនបើពួកគេមិនស្ដាប់ យើងនឹងបង្ហាញពិភពលោកឲ្យឃើញនៅភ្លើងកំហឹងទៅលើទីក្រុងព្យុងយ៉ាង ដែលមិនធ្លាប់មានពីមុន"៕
